Թուրքիայում լրագրող է կալանավորվել Սիրիայում թուրքական բանակի գործողությունները քննադատելու համար

Թուրքական դատարանը լրագրող Օզլեմ Գյուրսեսին տնային կալանքի է ենթարկել youtube-յան իր ալիքի ուղիղ եթերում Թուրքիայի զինված ուժերի (TSK) մասին հայտարարությունների համար, գրում է Duvar-ը։

Գյուրսեսը ձերբակալվել է, երբ Ստամբուլի գլխավոր դատախազությունը հայտարարություն է տարածել՝ մեջբերելով լրագրողի հաղորդումից, որտեղ նա ասել է. «Ինչպես տեսնում եք՝ ԻԼԻՊ-ը, այսինքն՝ TSK-ի Սիրիական ազգային բանակ կառույցը, փոքր ձեռքբերումներ է ունեցել այն շրջաններում, որտեղ քրդերը ներկա են»:

Դատախազները պնդում են, որ Գյուրսեսը TSK-ին համեմատել է ահաբեկչական կազմակերպության հետ, նրանց ներկայացրել է որպես խոշտանգումների և ջարդերի համար պատասխանատու խմբերի հետ համագործակցող և նրանց որպես օկուպացիոն ուժ պիտակավորել:

Լրագրողը ձերբակալվել է «պետության ինստիտուտներն ու մարմիններին վիրավորելու» և «ապակողմնորոշիչ տեղեկատվություն հրապարակայնորեն տարածելու» մեղադրանքով։ Իր ցուցմունքում Գյուրսեսն ասել է, որ մտադիր չի եղել ԻԼԻՊ-ին համեմատել թուրքական բանակի հետ, և որ իր խոսքերը «լեզվի սայթաքում» են։ Դատարանը նաև արգելել է լրագրողի միջազգային ճանապարհորդությունները՝ որպես դատական ​​հսկողության միջոցառումների մաս։

«Արդեն ակնհայտ էր, որ դա լեզվի սայթաքում էր։ Գյուրսեսն էլ է դա արտահայտել։ Միջադեպը երբեք չպետք է այսպես սրվեր։ Միջադեպեր կարող են տեղի ունենալ ուղիղ եթերի ժամանակ։ Շատ պարզ էր, որ այս հանցագործության մեջ դիտավորություն չկար։ Կարելի էր կապ հաստատել հեռախոսով: Բայց, ցավոք, մեր դատախազությունը նախընտրեց նրան ձերբակալել Անկարայում, ուր նա եկել էր մրցանակաբաշխության»,- ասել է լրագրողի փաստաբան Ֆուրքան Քամալակը։

Թարգմանությունը՝ Էմմա Չոբանյանի