24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
Թրամփը սպառնում է Պանամայի ջրանցքը վերադարձնել ԱՄՆ-ի վերահսկողությանը. Պանաման բացառել է նման հնարավորությունը
Քաղաքականություն
23.12.2024 | 12:54
ԱՄՆ նորընտիր նախագահ Դոնալդ Թրամփը դժգոհել է Պանամայի ջրանցքով ամերիկյան նավերի անցման բարձր մաքսատուրքերից և սպառնացել այն վերադարձնել ԱՄՆ-ի վերահսկողությանը, գրում է BBC-ի ռուսական ծառայությունը։
«Պանամայի կողմից գանձվող վճարները ծիծաղելի են և ծայրաստիճան անարդարացի: Մեր երկրի այս թալանն անմիջապես կդադարի»,- հայտարարել է Թրամփը Արիզոնայում կայացած պահպանողականների համաժողովում։
Մինչ այդ, Թրամփն իր Truth սոցիալական ցանցում գրել էր, որ Պանամայի ջրանցքը Միացյալ Նահանգների «կենսական ազգային արժեքն է», իսկ նախկին նախագահ Ջիմի Քարթերն «այն տվել է մեկ դոլարով»։
ԱՄՆ-ը վերահսկում էր ջրանցքը մինչև 1999 թվականը, երբ 1977 թվականի համաձայնագրով հսկողությունը հանձնեց Պանամայի իշխանություններին։
Մեկնաբանելով Թրամփի հայտարարությունները՝ Պանամայի նախագահ Խոսե Ռաուլ Մուլինոն ընդգծել է, որ ջրանցքը պատկանում է իր երկրին, և այդ հարցը քննարկման ենթակա չէ։
«Պանամայի ջրանցքի և հարակից տարածքների յուրաքանչյուր քառակուսի մետրը պատկանում է Պանամային և կշարունակի պատկանել նրան։ Մեր երկրի ինքնիշխանությունն ու անկախությունը քննարկման առարկա չեն կարող լինել»,- հայտարարել է նա։
Ըստ Մուլինոյի՝ սակագները սահմանվում են՝ ելնելով շուկայական պայմաններից և ջրանցքի շահագործման ու ենթակառուցվածքների սպասարկման ծախսերից։
Թարգմանությունը՝ Տաթև Ֆռանգյանի
