Ռուսաստանը ինտենսիվացնում է հարձակումները Կուրսկի մարզում և Ուկրաինայի արևելքում

Ռուսական զորքերը ինտենսիվացնում են հարձակումները Ռուսաստանի Կուրսկի շրջանում գտնվող ուկրաինական զորքերի վրա և ուժեղացնում են ճնշումը Դոնբասում, երեքշաբթի օրը հայտարարել է Ուկրաինայի Զինված ուժերի գլխավոր հրամանատարը, գրում է VOA-ն։

«Արդեն երրորդ օրն անընդմեջ հակառակորդը ինտենսիվ հարձակումներ է իրականացնում Կուրսկի շրջանում», – ասել է Ալեքսանդր Սիրսկին կառավարության և տարածաշրջանային իշխանություններին ուղղված առցանց ուղերձում: Նա հավելել է, որ Ռուսաստանը «ակտիվորեն» օգտագործում է հյուսիսկորեական զորքերը, որոնք զգալի կորուստներ են կրում։

Պենտագոնի խոսնակն ավելի վաղ հայտնել էր, որ հյուսիսկորեական զորքերը Կուրսկի շրջանում մի քանի հարյուր մարդ են կորցրել, այդ թվում՝ ինչպես սովորական զինվորների, այնպես էլ «շատ բարձրաստիճան» սպաների։

Ուկրաինացի զինվորականները երեկոյան հաղորդման մեջ հայտնել են, որ Ուկրաինայի զինված ուժերը Կուրսկի շրջանում հետ են մղել ռուսական 42 հարձակում։ Ավելի վաղ հրապարակված զեկույցում ասվում էր, որ 24 ժամվա ընթացքում բախումների թիվը հասել է 68-ի՝ նախորդ շաբաթվա օրական մոտ 40-ի դիմաց:

Ուկրաինան Կուրսկի շրջանում գործողություն է սկսել օգոստոսին, սակայն դրանից հետո կորցրել է իր վերահսկողության տակ գտնվող սահմանային տարածքի ավելի քան 40%-ը։

Ռազմական վերլուծաբաններն ասում են, որ այդ քայլը երկարացրել է առանց այն էլ երկար ճակատային գիծը՝ լրացուցիչ ծանրաբեռնվածություն առաջացնելով Ուկրաինայի զինված ուժերի համար:

Սիրսկին նշել է, որ մարտերը սրվում են նաև Դոնբասում, որտեղ ռուսական զորքերը այս տարի առաջ են շարժվում ամենաարագ տեմպերով։ Նա կառավարության և տարածաշրջանային պաշտոնյաներին ասել է, որ ռուսական զորքերը շարունակում են հարձակումները Պոկրովսկի և Կուրախովոյի լոգիստիկ հանգույցների վրա:

Թարգմանությունը՝ Տաթև Ֆռանգյանի