Ռուսաստանը Ղազախստանի ուրանի հանքերը կհանձնի Չինաստանին

Աշխարհի ամենամեծ ուրան արտադրողը՝ Ղազախստանի պետական «Կազատոմպրոմ»-ը, հայտնել  է, որ Uranium One Group-ը, որը ռուսական պետական «Ռոսատոմ»-ի մաս է կազմում, դուրս է գալիս Ղազախստանում ուրանի երկու համատեղ ձեռնարկություններից, հայտնում է Reuters-ը։

Uranium One Group-ը վաճառել է իր Զարեչնոյե համատեղ ձեռնարկության 49,979%-ը, որն ուրանն արդյունահանում է Թուրքեստանի տարածաշրջանի հանքավայրում, SNURDC Astana Mining Company-ին, որը պատկանում է չինական State Nuclear Uranium Resources Development Co ընկերությանը:

«Կազատոմպրոմ»-ի մասնաբաժինն այս համատեղ ձեռնարկությունում չի փոխվել և կազմում է 49,979%: Զարեչնոյեի հանքավայրի ուրանի պաշարները 2024 թվականի սկզբին կազմում էին շուրջ 3500 տոննա, իսկ շահագործման ավարտը նախատեսվում է 2028 թվականին։

Ակնկալվում է, որ Uranium One-ը կվաճառի Khorasan-U համատեղ ձեռնարկության 30%-ը և Kyzylkum LLC-ի կանոնադրական կապիտալի 30%-ը China Uranium Development Company Limited-ին, որի վերջնական շահառուն է China General Nuclear Power Corporation-ը: Երկու համատեղ ձեռնարկություններում էլ «Կազատոմպրոմ»-ի մասնաբաժինը չի փոխվի և կմնա 50 տոկոս:

Ավելի վաղ հայտնի էր դարձել, որ ռուսական իշխանությունները ստիպված են եղել անորոշ ժամանակով հետաձգել Սանկտ Պետերբուրգի մոտ գտնվող նախկին Toyota գործարանում Aurus ավտոմեքենաների արտադրության մեկնարկը՝ չինացի գործընկերների հետ բանակցությունների խզման պատճառով։

Թարգմանությունը՝ Տաթև Ֆռանգյանի