01.06.2026 | 22:10
Nvidia-ն ներկայացրել է իր նոր՝ RTX Spark սուպերչիպը
Դամասկոսի մերձակայքում զանգվածային գերեզմանոցում առնվազն 100 հազար դի է հայտնաբերվել. ՏԵՍԱՆՅՈՒԹ
Քաղաքականություն
17.12.2024 | 13:33
Սիրիայի մայրաքաղաք Դամասկոսի մերձակայքում գտնվող զանգվածային գերեզմանոցում առնվազն 100,000 մարդու դի է հայտնաբերվել, որոնք, ենթադրաբար, սպանվել են տապալված նախագահ Բաշար Ասադի վարչակարգի կողմից։ Այս մասին հայտարարել է Սիրիայի արտակարգ իրավիճակների աշխատանքային խմբի ղեկավարը, գրում է Al Jazeera-ն։
Ըստ Reuters-ի՝ Մուազ Մուստաֆան ասել է, որ Ալ-Քութայֆահը, որը գտնվում է Սիրիայի մայրաքաղաքից 40 կմ հյուսիս, հինգ զանգվածային գերեզմաններից մեկն է, որոնք նա հայտնաբերել է տարիների ընթացքում։
«Հարյուր հազարն ամենապահպանողական գնահատականն է տեղում թաղված դիակների թվի վերաբերյալ։ Դա շատ, ծայրահեղ, գրեթե անարդարացիորեն պահպանողական գնահատական է»,- ասել է նա։
Մուստաֆան ասել է, որ ավելի շատ զանգվածային գերեզմաններ կան, որտեղ, սիրիացի զոհերի հետ միասին, կան օտարերկրացիներ:
Ենթադրվում է, որ հարյուր հազարավոր սիրիացիներ են սպանվել 2011 թվականից ի վեր, երբ Բաշար Ասադի կողմից իր իշխանության դեմ բողոքի ցույցերի ճնշումը վերածվեց լայնամասշտաբ քաղաքացիական պատերազմի:
Սիրիացիները, իրավապաշտպան կազմակերպությունները և այլ երկրների կառավարություններ Ասադին և նրա հորը՝ Հաֆեզ Ասադին մեղադրում են համատարած արտադատական սպանությունների, այդ թվում՝ երկրի տխրահռչակ բանտային համակարգում զանգվածային մահապատիժների մեջ:
Բաշար Ասադը բազմիցս հերքել է, որ իր կառավարությունը մարդու իրավունքների խախտումներ է թույլ տվել։
Թարգմանությունը՝ Էմմա Չոբանյանի
