Նոր զարգացումներ Աղազարյանի շուրջ. ովքեր են պետական գաղտնիքի արտահոսքի մեղավորները. ՏԵՍԱՆՅՈՒԹ

ԱԺ պատգամավոր Հովիկ Աղազարյանի վերաբերյալ Հակակոռուպցիոն կոմիտեում նախաձեռնվել է քրեական վարույթ Քրեական օրենսգրքի 427-րդ հոդվածի 1-ին մասով՝ պետական գաղտնիք պարունակող տեղեկություն հրապարակելու մեղադրանքով։ Այս մասին Factor TV-ին հայտնել են Հակակոռուպցիոն կոմիտեից։ 

Դեկտեմբերի 3-ին իշխող ՔՊ-ն Աղազարյանին կուսակցությունից հեռացրեց հենց այն հիմնավորմամբ, թե նա, իբր, պետական և կուսակցական նշանակության կոնֆիդենցիալ տեղեկատվություն է հանրայնացրել, ինչպես նաև թույլ է տվել հանրության բարոյական նորմերի կոպիտ խախտումներ։

Վարչության նիստի հաջորդ օրը ՔՊ խմբակցության ղեկավար Հայկ Կոնջորյանը որոշակի մանրամասներ ներկայացրեց Աղազարյանի՝ գաղտնիք պարունակող տեղեկությունների հանրայնացման վերաբերյալ։

ՔՊ-ն Հովիկ Աղազարյանի գործողություններում պետությանը վնասող տեղեկությունների արտահոսքի մասին բարձրաձայնեց այն բանից հետո, երբ պատգամավորը հրաժարվեց կատարել Նիկոլ Փաշինյանի՝ մանդատը վայր դնելու պահանջը։ Սրան նախորդել էր Աղազարյանի և արդեն ՔԿ նախկին նախագահ Արգիշտի Քյարամյանի  միջև աղմկահարույց միջադեպը խորհրդարանում։

Նիկոլ Փաշինյանի ղեկավարած «Քաղաքացիական պայմանագիր» կուսակցության և քաղաքական ուժը լքած Հովիկ Աղազարյանի շուրջ առաջացած աղմուկի ֆոնին ստվերվեց մեկ կարևոր հարց․ արդյո՞ք Նիկոլ Փաշինյանն իրավունք ուներ ՔՊ-ականների հետ հանդիպման ընթացքում պետական գաղտնիք պարունակող տեղեկություն հանրայնացնել։

Պետական գաղտնիքի մասին ՀՀ օրենքի համաձայն՝ նախագահի, Ազգային ժողովի նախագահի և վարչապետի՝ պետական գաղտնիք պարունակող տեղեկություններին առնչվելու թույլտվությունը երաշխավորվում է համապատասխան պաշտոնում նրանց ընտրվելուց կամ նշանակվելուց անմիջապես հետո։ Մյուս պաշտոնյաներին հասանելիությունը կարգավորվում է նույն օրենքի 20-րդ հոդվածի առաջին մասով, որտեղ նշված է՝ Պետական գաղտնիք պարունակող տեղեկություններին առնչվելու թույլտվություն կարող են ունենալ Հայաստանի Հանրապետության քաղաքացիները` աշխատանքային կամ ծառայողական անհրաժեշտությամբ պայմանավորված կամ գիտական աշխատանք կատարելու անհրաժեշտությամբ։ Հովիկ Աղազարյանը պնդում է, թե ինքը հասանելիություն չի ունեցել պետական գաղտնիք պարունակող տեղեկությունների։

Factor TV-ի տաղավարում ՔՊ կուսակցության փոխնախագահ Վահագն Ալեքսանյանն Աղազարյանի հայտարարությունից հետո նշեց, որ Նիկոլ Փաշինյանը փակ նիստում հայ-ադրբեջանական բանակցային գործընթացից կարևոր տեղեկություններ է բացահայտել, ինչը հայտնվել է լրատվամիջոցներում։

Փաստաբան Ռուբեն Մելիքյանը ՔՊ-ականների և կուսակցությունից հեռացած Աղազարյանի հայտարարությունները համեմատելով՝  նշում է՝ կա՛մ այդ տեղեկությունները գաղտնի չեն եղել, կա՛մ գաղտնի են եղել և Նիկոլ Փաշինյանը նույնպես պետք է պատասխանատվության ենթարկվի։

Նիկոլ Փաշինյանի ազգական, ՔՊ-ական պատգամավոր Հրաչյա Հակոբյանը վստահեցնում է՝ Փաշինյանը գաղտնիության ռեժիմից դուրս որևէ անձի պետությանը վտանգող տեղեկություն չի փոխանցել։

Արդյո՞ք Նիկոլ Փաշինյանը պետք է պատասխանատվության ենթարկվի, եթե պարզվի, որ պետական գաղտնիք պարունակող տեղեկությունը հանրայնացրել է թիմի անդամների շրջանում, որտեղից էլ, ըստ ՔՊ-ականների, արտահոսք է եղել։

Հրաչյա Հակոբյանը չի կարծում, թե Փաշինյանը թերացել է այս հարցում, նա սլաքներն ուղղում է դեպի ԱԱԾ։

Հակակոռուպցիոն կոմիտեն այսօր չհստակեցրեց, թե Հովիկ Աղազարյանն ինչ կարգավիճակ ունի քրեական վարույթով։ Հայտնի չէ նաև՝ արդյո՞ք Նիկոլ Փաշինյանը ևս որևէ կարգավիճակ ունի այս գործով։ Հիշեցնենք, որ 44-օրյա պատերազմի ընթացքում Փաշինյանի կողմից եղել է երկրի անվտանգությանն առնչվող գաղտնի  տեղեկությունների հանրայնացում, ինչի հետ կապված, սակայն, որևէ իրավական հետևանք չի եղել։ 

Մանրամասները՝ տեսանյութում։

Նարեկ Կիրակոսյան