26.05.2026 | 12:35
Գեղակերտում հավաքի մասնակցելու դիմաց 15 հազար դրամ են բաժանել․ ՆԳՆ
Ասադը գրեթե երկու տոննա եվրո և դոլար է ուղարկել Մոսկվա. FT
Քաղաքականություն
16.12.2024 | 13:41
2018-2019 թվականներին Սիրիայի Կենտրոնական բանկն ինքնաթիռով Մոսկվա է ուղարկել շուրջ 250 միլիոն դոլար կանխիկ գումար։ Այս մասին գրում է Financial Times (FT) պարբերականը՝ վկայակոչելով գաղտնի փաստաթղթեր։
Այդ տարիներին Սիրիայում իշխանության ղեկին էր նախագահ Բաշար ալ-Ասադը, և նա «Կրեմլին պարտական էր ռազմական աջակցության համար»։ Միաժամանակ, ըստ հրապարակման, երկրում «արտարժույթի սուր պակաս» է զգացվել։
FT-ն գրում է, որ Սիրիայի իշխանությունները Ռուսաստան են ուղարկել մոտ 2 տոննա 100 դոլար և 500 եվրո արժողությամբ թղթադրամ։ Այս գումարը, իբր, նախատեսված է եղել ռուսական բանկերում տեղաբաշխման համար։ Պարբերականը, վկայակոչելով արտահանման տվյալների Import Genius ծառայությունը, պարզաբանում է, որ 2019 թվականի մայիսի 13-ին ինքնաթիռը վայրէջք է կատարել «Վնուկովո»-ում՝ տեղափոխելով 10 միլիոն դոլար՝ 100 դոլարանոց թղթադրամներ, որոնք ուղարկվել են Սիրիայի Կենտրոնական բանկի անունից։
2019 թվականի փետրվարին առաքվել է ևս 20 միլիոն եվրո՝ 500 եվրո անվանական արժեքով թղթադրամներով: 2018 թվականի մարտից մինչև 2019-ի սեպտեմբեր կանխիկ գումարի փոխադրման համար իրականացվել է 21 չվերթ։ Մինչև 2018 թվականը նման դրամական փոխանցումներ չեն եղել Սիրիայի Կենտրոնական բանկի և ռուսական բանկերի միջև։ Մոսկվա առաքված միջոցները, իբր, փոխանցվել են «Ռուսական ֆինանսական կորպորացիա» բանկին (պատկանում է «Ռոսօբորոնէքսպորտին»:
2018 թվականի մարտին Սիրիայի Կենտրոնական բանկը 2 մլն դոլար է փոխանցել նաև ռուսական CMRBank-ին, գրում է FT-ն։ Երկու վարկային հաստատություններն էլ հետագայում ենթարկվել են ԱՄՆ-ի պատժամիջոցներին:
Պարբերականը նաև պնդում է, որ Ասադի ընտանիքը գաղտնի «ակտիվներ է գնել Ռուսաստանում», ներառյալ՝ շքեղ գույք Մոսկվայում:
Թարգմանությունը՝ Տաթև Ֆռանգյանի
