Քաղաքականություն
12.12.2024 | 17:40
Սիրիայում հայտնաբերել են ԱՄՆ քաղաքացու, որը պատմել է, որ ձերբակալվել է յոթ ամիս առաջ քրիստոնեական ուխտագնացության ժամանակ ոտքով երկրի սահմանը հատելուց հետո, գրում է AP-ն։
Թրևիս Թիմերմանը, ըստ երևույթին, եղել է Սիրիայի տխրահռչակ բանտերից ազատված հազարավոր մարդկանց թվում այն բանից հետո, երբ ապստամբները Դամասկոս են հասել՝ տապալելով նախագահ Բաշար Ասադին և վերջ տալով նրա ընտանիքի 54-ամյա կառավարմանը:
Համացանցում հայտնվել է Թիմերմանի մասնակցությամբ տեսանյութ։ Ոմանք սկզբում նրան շփոթել են Օսթին Թայսի հետ՝ ամերիկացի լրագրողի, որն անհետացել էր Սիրիայում 12 տարի առաջ: Տեսանյութում պատկերված տղամարդկանց խումբն ասում է, որ նրա հետ լավ են վերաբերվում և ապահով տուն կվերադառնա։
ԱՄՆ պաշտոնյաները դեռևս մեկնաբանություն չեն արել այս կապակցությամբ։
Ավելի ուշ Թիմերմանը հարցազրույց է տվել «Ալ-Արաբիա»-ին՝ ասելով, որ յոթ ամիս առաջ ապօրինի ոտքով անցել է Սիրիա արևելյան Լիբանանի Զահլե քաղաքից, այնուհետև կալանավորվել է: Նա նշել է, որ իրեն լավ են վերաբերվել կալանավայրում, սակայն լսել է, թե ինչպես են այլ երիտասարդների խոշտանգում:
«Ամեն ինչ լավ էր։ Ինձ կերակրել են, խմելու բան են տվել։ Միակ դժվարությունն այն էր, որ ես չէի կարողանում սանհանգույց գնալ, երբ ուզում էի։ Ինձ չեն ծեծել, և պահակները ինձ հետ վարվել են արժանապատիվ»,- ասել է ամերիկացին։
Հաղորդվում է, որ ԱՄՆ կառավարության գլխավոր բանակցող Ռոջեր Քարսթենսը այս շաբաթվա սկզբին մեկնել է Լիբանան՝ լրագրող Օստին Թայսի գտնվելու վայրի մասին տեղեկություններ հավաքելու ակնկալիքով:
Նախագահ Ջո Բայդենն ասել է, որ իր վարչակազմը կարծում է՝ Թայսը ողջ է, և պարտավորվել է տուն վերադարձնել նրան։
Թարգմանությունը՝ Էմմա Չոբանյանի
