Խոսել ենք հակամարտության սառեցման մասին. Զելենսկին բացահայտել է Փարիզում Մակրոնի և Թրամփի հետ բանակցությունների մանրամասները

Ուկրաինայի նախագահ Վլադիմիր Զելենսկին հաստատել է, որ դեկտեմբերի 7-ին Փարիզում Ֆրանսիայի նախագահ Էմանուել Մակրոնի և ԱՄՆ նորընտիր նախագահ Դոնալդ Թրամփի հետ հանդիպմանը քննարկել են, մասնավորապես, հակամարտության սառեցման ձևաչափը, փոխանցում է NV-ն։

Ուկրաինայի առաջնորդը մեկնաբանել է հակամարտությունը սառեցնելու՝ Թրամփի հավանական ցանկությունը։

«Եթե խոսում ենք հակամարտության սառեցման մասին, մեր մեջ ասած, ապա խոսել ենք դրա մասին: Ես ասացի, որ մենք աշխարհում բոլորից առավել ուզում ենք պատերազմի ավարտը։ Եվ, իհարկե, պատերազմի դիվանագիտական ավարտն ավելի շատ կյանքեր կփրկի։ Եվ մենք դա ուզում ենք: Բայց ես ընդգծեցի և՛ նախագահ Մակրոնին, և՛ նախագահ Թրամփին՝ կտեսնեք, որ Պուտինը չի ցանկանում, որ այս պատերազմն ավարտվի, ուստի պետք է նրան ստիպել»,- ընդգծել է Զելենսկին։

Ուկրաինայի ղեկավարը նաև ասել է, որ դա հնարավոր է պարտադրել միայն այն դեպքում, եթե Ուկրաինան ուժեղ լինի։

«Ուժեղ Ուկրաինան, մինչև ցանկացած դիվանագիտությունը, ուժեղ Ուկրաինան է մարտի դաշտում։ Դա ուժեղ բանակն է, դրանք զենքի փաթեթներ են և այլն, դրանք հեռահար համակարգեր են, իհարկե, ATACMS-ը, TAURUS-ը, Storm Shadow-ն, SCALP-ը: Այս ամենի կարիքը մենք իսկապես շատ ունենք»,- ասել է Զելենսկին՝ ընդգծելով, որ դրանք բացառապես ռազմական օբյեկտների վրա հարձակումների համար են։

Հիշեցնենք, որ ԱՄՆ նորընտիր նախագահ Դոնալդ Թրամփի, Ուկրաինայի նախագահ Վլադիմիր Զելենսկիի և Ֆրանսիայի նախագահ Էմանուել Մակրոնի հանդիպումը տեղի է ունեցել նոյեմբերի 7-ին Փարիզում։ Զրույցը տևել է մոտ 35 րոպե։

Թարգմանությունը՝ Տաթև Ֆռանգյանի