03.04.2025 | 23:31
Հայտնի են հունահռոմեական ոճի ըմբշամարտի Հայաստանի պատանեկան առաջնության հաղթողները
Բաքվի դատարանն անկախ Meydan TV-ի աշխատակիցներին 4 ամսով կալանավորել է
Քաղաքականություն
09.12.2024 | 20:13
Բաքվի Խաթայի շրջանային դատարանն ադրբեջանական անկախ Meydan TV-ի աշխատակիցների դեմ հարուցված քրեական գործով նիստում որոշել է, որ լրագրողները կալանքի տակ են մնալու։ Դատարանը որոշել է 4 ամսով կալանավորել լրագրողներ Այթաջ Ահմադովային, Այսել Ումուդովային, Այնուր Գանբարովային, Նաթիկ Ջավադլիին, Ռամին Ջաբրայիլզադեյին և Խայալ Աղաևին։ Բացի այդ՝ 4 ամսով կալանավորվել է քաղաքացիական հասարակության ներկայացուցիչ, անկախ լրագրող Ուլվի Թահիրովը, որը Meydan TV-ի աշխատակից չէ։
Բոլորին մեղադրանք է առաջադրվել Ադրբեջանի քրեական օրենսգրքի 206.3.2 հոդվածով (մաքսանենգություն, որը կատարվել է մի խումբ անձանց կողմից նախնական համաձայնությամբ): Ձերբակալված լրագրողների մեծ մասի տներում խուզարկություններ են անցկացվել, սարքավորումներն ու անձնական իրերն առգրավվել են։
Meydan TV-ի ղեկավարությունը հայտարարություն է տարածել, որում նշում է, որ լրագրողներին ոստիկանության կողմից առաջադրված մեղադրանքներն անհիմն են, իսկ նրանց կալանավորումն անօրինական է և ճնշում է անկախ լրատվամիջոցների նկատմամբ։
Միաժամանակ, 20-օրյա վարչական կալանքի է ենթարկվել ֆոտոլրագրող Ահմեդ Մուխթարը, որը ձերբակալվել էր Meydan TV-ի լրագրողների հետ։ Նա մեղավոր է ճանաչվել Վարչական իրավախախտումների վերաբերյալ օրենսգրքի 510 (մանր խուլիգանություն) և 535.1 (ոստիկանությանը չենթարկվել) հոդվածներով։
Մուխթարից բացի՝ ոստիկանության էին տարվել նաև Meydan TV-ի հետ կապ չունեցող մի շարք անձինք՝ կենդանիների իրավունքների պաշտպան Քյամրան Մամեդլին, սպորտային լրագրող Ռաշիդ Էրգյունը և Էլնուր Ջաբրայիլզադեն։ Մամեդլին հայտարարել է, որ ոստիկանությունում իրեն ծեծել են, խոշտանգել էլեկտրաշոկով։
Հավելենք, որ 2023 թվականի նոյեմբերից Ադրբեջանում տասնյակ լրագրողներ են կալանավորվել «մաքսանենգության» մեղադրանքով։ Տեղական և միջազգային իրավապաշտպան կազմակերպությունները մեղադրանքները համարում են շինծու և կոչ են անում Ադրբեջանի իշխանություններին անհապաղ ազատ արձակել լրագրողներին։
Թարգմանությունը՝ Էմմա Չոբանյանի
