10.08.2026 | 16:09
Երբ պատգամավորն ասում է՝ ուզում եմ հայ զինվորը մեռնի, քննարկելի՞ է էթիկայի հանձնաժողովում․ Ռուբինյան. ՏԵՍԱՆՅՈՒԹ
Ալիևի օգնականը Հարավային Կովկասում զարգացումներն է քննարկել Իսրայելի ԱԳ նախարարի հետ
Քաղաքականություն
09.12.2024 | 13:31
Ադրբեջանի նախագահ Իլհամ Ալիևի օգնական Հիքմեթ Հաջիևը Երուսաղեմում հանդիպել է Իսրայելի արտգործնախարար Գիդեոն Սաարի հետ։
«Հաճելի էր հանդիպել Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևին։ Մենք քննարկել ենք վերջին զարգացումները Մերձավոր Արևելքում և Կովկասում, տարածաշրջանային անվտանգությունը և Իսրայելի ու Ադրբեջանի միջև ամուր երկկողմ հարաբերությունները։ Մեր հարաբերություններն ամուր են, և մենք հավատարիմ ենք դրանք է՛լ ավելի ամրապնդելու հանձնառությանը»,- գրել է Սաարը X-ի իր միկրոբլոգում։
Ավելի վաղ հանդիպման մասին հայտնել էր Իսրայելի փոխարտգործնախարար Շարեն Հասկելը՝ նշելով, որ այն տեղի է ունեցել Երուսաղեմում։
Հիշեցնենք, որ Բաքվում նոյեմբերին անցկացված ՄԱԿ-ի կլիմայական համաժողովին (COP29) նախատեսվում էր նաև Իսրայելի նախագահ Իցհակ Հերցոգի մասնակցությունը։ Նրա այցը նախատեսված էր նոյեմբերի 19-ին, սակայն նոյեմբերի 16-ին Իսրայելի նախագահի գրասենյակը հայտնել էր, որ «իրավիճակը գնահատելուց հետո և անվտանգության նկատառումներից ելնելով՝ նախագահը որոշել է չեղարկել մասնակցությունն Ադրբեջանում կայանալիք կլիմայական համաժողովին»: Ավելի ուշ ադրբեջանական, այնուհետև իսրայելական աղբյուրները սկսեցին տեղեկություններ տարածել, որ պատճառը Թուրքիայի կողմից իր օդային տարածքով թռիչքի արգելափակումն է։ Այնուհետև Թուրքիայի նախագահ Ռեջեփ Թայիփ Էրդողանը հաստարարեց՝ Անկարան է արգելափակել Իսրայելի նախագահի թռիչքը։
Էմմա Չոբանյան
