Ասադը մերժել է բանակցելու Էրդողանի առաջարկը

Թուրքիայի նախագահ Ռեջեփ Թայիփ Էրդողանը, մեկնաբանելով Սիրիայում հակակառավարական ուժերի հարձակումը, հույս է հայտնել, որ «ընդդիմության երթը» կշարունակվի առանց միջադեպերի։ Նա նշել է, որ արդեն առաջարկել է Սիրիայի նախագահ Բաշար Ասադին բանակցություններ սկսել, սակայն նա մերժել է։

«Մենք զանգահարել ենք Ասադին։ Ասացինք՝ եկեք միասին որոշենք Սիրիայի ապագան։ Ցավոք, դրական պատասխան չստացանք այս հարցում։ Իդլիբի հետ կապված ամեն ինչ պարզ է։ Հոմսը գտնվում է ընդդիմության ձեռքում, և խոսքը նրանց երթի մասին է դեպի Դամասկոս։ Տարածաշրջանը ծանր վիճակում է, և այս երթերն այն չեն, ինչ մենք կցանկանայինք տեսնել։ Տարածաշրջանը գտնվում է բարդ իրավիճակում»,- լրագրողներին ասել է Ռեջեփ Թայիփ Էրդողանը, փոխանցում է CNN Turk-ը:

Էրդողանը հուլիսին պատրաստակամություն էր հայտնել հրավիրել ՌԴ նախագահ Վլադիմիր Պուտինին և Բաշար ալ-Ասադին Թուրքիա՝ Ռուսաստանի ղեկավարի միջնորդությամբ Անկարայի և Դամասկոսի միջև հարաբերությունների կարգավորման հարցը քննարկելու համար։ Երկրների դիվանագիտական ​​հարաբերությունները խզվել են 2012 թվականին՝ Սիրիայում քաղաքացիական պատերազմի սկսվելուց մեկ տարի անց։

Մինչ սիրիական խմբակցությունների կոալիցիան շարունակում է առաջխաղացումը Սիրիայի հյուսիս-արևմուտքում, Թուրքիան բախվել է դիվանագիտական ​​ճնշման և հակակառավարական ուժերին աջակցելու մեղադրանքների: Անկարան հերքում է իր մասնակցությունը գրոհայինների գործունեությանը։ Շաբաթվա սկզբին կայացած հեռախոսազրույցում Վլադիմիր Պուտինը Ռեջեփ Թայիփ Էրդողանին մատնանշել է Սիրիայում կարգուկանոնը վերականգնելու անհրաժեշտությունը՝ «օգտագործելով Անկարայի առկա հնարավորությունները տարածաշրջանում»:

Թարգմանությունը՝ Տաթև Ֆռանգյանի