18.07.2026 | 10:51
Վենեսուելայում երկրաշարժերի հետևանքով զոհերի թիվը գերազանցել է 5000-ը
ՆԱՏՕ-ի անդամ երկրները քննարկում են Ուկրաինայի հարցով մոտալուտ բանակցությունների հնարավորությունը․ Bloomberg
Քաղաքականություն
05.12.2024 | 15:55
ՆԱՏՕ-ի երկրները մտադիր են մեծացնել Ուկրաինային զենքի մատակարարումները՝ Ռուսաստանի հետ բանակցությունները սկսելուց առաջ նրա դիրքերն ամրապնդելու համար։ Այս մասին գրում է Bloomberg-ը՝ վկայակոչելով դիվանագիտական աղբյուրները։ Նրանց խոսքով՝ Դոնալդ Թրամփի՝ Սպիտակ տուն վերադառնալու և ճակատում տիրող իրավիճակի ֆոնին Կիևի դաշնակիցները համոզված են, որ բանակցությունները պետք է սկսվեն մոտ ապագայում։
Դեկտեմբերի 3-4-ին Բրյուսելում կայացած հանդիպմանը ՆԱՏՕ-ի ԱԳ նախարարները կենտրոնացել են սպառազինությունների մատակարարման հարցերի վրա, մինչդեռ դաշինքի անդամ երկրների կառավարությունները քննարկում են բանակցությունները վերսկսելու տարբեր սցենարներ, գրում է Bloomberg-ը։
Քննարկվում են նաև Ուկրաինայի անվտանգության այնպիսի երաշխիքներ, որոնք «չեն հրահրի Պուտինին», ասել են գործակալության զրուցակիցները։
Հնարավոր տարբերակների թվում է ճակատային գծի երկայնքով ապառազմականացված գոտու ստեղծումը, որը, հավանաբար, պարեկելու են եվրոպական զորքերը։ Այս սցենարը դիտարկում է նաև Դոնալդ Թրամփի թիմը։
Մինչդեռ դեկտեմբերի 3-ին ՆԱՏՕ-ի գլխավոր քարտուղար Մարկ Ռյուտեն, ի պատասխան լրագրողների ՝ Ուկրաինայի կողմից հնարավոր տարածքային զիջումների մասին հարցերին, պատասխանել է. «Ավելի շատ ռազմական օգնություն ու ավելի քիչ քննարկումներ, թե ինչ տեսք կունենան խաղաղության շուրջ բանակցությունները»։
Թարգմանությունը՝ Տաթև Ֆռանգյանի
