22.06.2026 | 13:35
ՏԿԵ փոխնախարարը ընդերքօգտագործողների հետ քննարկել է փոշեճնշիչ սարքավորումների պարտադիր կիրառումը
ԵԽ-ն դատապարտել է Վրաստանում ոստիկանության գործողությունները
Քաղաքականություն
05.12.2024 | 15:23
Եվրախորհրդի մարդու իրավունքների հանձնակատար Մայքլ Օ՛Ֆլաերտին Վրաստանում բողոքի ցույցերի ժամանակ ոստիկանության գործողություններն անհիմն է անվանել, փոխանցում է Գրուզիա օնլայնը։
«Թեև որոշ ցուցարարների կողմից բռնության գործողություններ են տեղի ունեցել, դրանք չեն արդարացնում ոստիկանության կողմից ուժի չափից ավելի կիրառումը: Ինչ վերաբերում է խաղաղ ցուցարարների դեմ ջրցան մեքենաների և պղպեղային սփրեյի համատարած կիրառման մասին հաղորդումներին, ես շեշտում եմ, որ ուժը պետք է լինի վերջին միջոցը և պետք է համապատասխանի խիստ անհրաժեշտության և համաչափության չափանիշներին: Ցույցի ցրումը պետք է տեղի ունենա որպես վերջին միջոց՝ միայն ապաէսկալացիայի համապատասխան ջանքերից հետո: Խաղաղ ցուցարարները պետք է պահպանեն ազատ հավաքների իրենց իրավունքը»,- ասել է Օ՛Ֆլաերտին։
Նա նշել է, որ ավելի քան երկու հարյուր ձերբակալվածներից շատերը, որոնց այցելել են օմբուդսմենի գրասենյակից, ենթարկվել են ոստիկանական դաժան վերաբերմունքի: Վրաստանի հանրային պաշտպանի հաղորդագրությունների համաձայն՝ մեծամասնությունը լուրջ վնասվածքներ է ստացել դեմքի, աչքերի և գլխի շրջանում։
Հայտնի են նաև բողոքի ակցիաները լուսաբանող լրագրողների նկատմամբ ուժի անհամաչափ կիրառման դեպքեր։
Թարգմանությունը՝ Տաթև Ֆռանգյանի
