04.04.2026 | 11:55
Երևանի Կենտրոն վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Հյուսիսային Կորեան հայտարարել է, որ ՌԴ-ի հետ ռազմավարական գործընկերության համաձայնագիրը նոր է ուժի մեջ մտել
Քաղաքականություն
05.12.2024 | 16:35
Հյուսիսային Կորեայի KCNA գործակալությունն ու Rodong Sinmun պարբերականը գրում են, որ Ռուսաստանի հետ Համապարփակ ռազմավարական գործընկերության պայմանագիրը պաշտոնապես ուժի մեջ է մտել, փոխանցում է BBC-ի ռուսական ծառայությունը։
Պայմանագիրը ստորագրվել է երկու երկրների նախագահներ Վլադիմիր Պուտինի և Կիմ Չեն Ընի կողմից հուլիսի 19-ին, սակայն վավերացման գործընթացը թե՛ Ռուսաստանում, թե՛ Հյուսիսային Կորեայում ավարտվել է նոյեմբերին։
Դեկտեմբերի 4-ին Մոսկվայում տեղի է ունեցել վավերացման փաստաթղթերի փոխանակում, նշում են հյուսիսկորեական լրատվամիջոցները։ Համաձայնագրի տեքստի համաձայն՝ այն պետք է ուժի մեջ մտնի այդ պահից։
Պայմանագրի վրա հիմնված երկու երկրների հարաբերությունները «հզոր շարժիչ ուժ կծառայեն անկախ և արդար բազմաբևեռ աշխարհակարգի ձևավորման արագացման համար, որտեղ գոյություն չունեն գերիշխանություն, ենթակայություն և հեգեմոնիա», գրում է KCNA-ն։
Պայմանագիրը պարունակում է հոդված երրորդ երկրի կողմից հարձակման դեպքում օգնության մասին: Շատ մեկնաբաններ կարծում են, որ պայմանագիրն իրավական հիմք է ստեղծում Ուկրաինայի հետ պատերազմին հյուսիսկորեական զորքերի մասնակցության համար, սակայն Մոսկվան և Փհենյանը բացահայտ չեն խոսել այդ մասին։
Թարգմանությունը՝ Տաթև Ֆռանգյանի
