Քաղաքականություն
04.12.2024 | 20:21
ԱՄՆ պետքարտուղար Էնթոնի Բլինքենը հայտարարել է, որ Ուկրաինային նոր մոբիլիզացիայի հարցում բարդ որոշումներ են սպասվում։ Նա ասել է, թե Ուկրաինան շարժվում է դեպի ՆԱՏՕ-ին անդամակցություն, սակայն ժամկետներ չի նշել։
Դեկտեմբերի 3-ին և 4-ին ՆԱՏՕ-ի արտգործնախարարները Բրյուսելում քննարկել են Ուկրաինային աջակցելու ծրագիրը։ Ուկրաինայի արտաքին գործերի նախարար Անդրեյ Սիբիգան պնդել է, որ դաշինքը պետք է առաջարկի «պատմական» միջոցներ՝ ուղղված երկրի անվտանգությանը։
Պատասխանելով BBC-ի հարցին, թե ՆԱՏՕ-ն կոնկրետ ի՞նչ միջոցներ է առաջարկում՝ ուժեղացնելու Ուկրաինայի դիրքերը Ռուսաստանի հետ հնարավոր բանակցություններից առաջ, Բլինքենն ասել է, որ նախարարներն իրենց քննարկումներում կենտրոնացել են 3 թեմաների շուրջ։
Առաջինը՝ Ուկրաինային տրամադրել անհրաժեշտ ֆինանսներ և ռեսուրսներ՝ երկրի տնտեսությանն ու պաշտպանությանն աջակցելու համար։
«Մենք կարողացանք, օգտագործելով Ռուսաստանի սառեցված ակտիվները, Ուկրաինային տրամադրել 50 միլիարդ դոլար։ Այդ միջոցները կուղարկվեն առաջիկա շաբաթներին և՛ ԱՄՆ-ից, և՛ Եվրոպայից»,- ասել է նա։
Երկրորդ թեման Ուկրաինային զենք տրամադրելն է։ Ուկրաինայի ԱԳՆ ղեկավար Անդրեյ Սիբիգան ասել է, որ Կիևին անհրաժեշտ են 20 NASAMS կամ IRIS-T հակաօդային պաշտպանության համակարգեր՝ երկրի էներգետիկ ենթակառուցվածքը ռուսական հարձակումներից պաշտպանելու համար։
«Մենք քննարկել ենք Ուկրաինայի կարիքները և այն, թե ինչպես յուրաքանչյուր երկիր կարող է նպաստել դրանց բավարարմանը»,- ասել է Բլինքենը՝ մանրամասներ չներկայացնելով:
Երրորդ թեման, ըստ նրա, մոբիլիզացիան է։
«Սա չափազանց կարևոր է, քանի որ նույնիսկ փողի և զինամթերքի առկայության դեպքում առաջին գծում պետք է լինեն մարդիկ, ովքեր կարող են դիմակայել ռուսական ագրեսիային: Ուկրաինան ստիպված կլինի բարդ որոշումներ կայացնել հետագա մոբիլիզացիայի վերաբերյալ, սակայն դրանք անհրաժեշտ քայլեր են։ Մենք հանձնառու ենք ապահովելու, որ յուրաքանչյուր մոբիլիզացված զինվոր ստանա անհրաժեշտ ուսուցում և սարքավորումներ՝ արդյունավետ պաշտպանելու իր երկիրը»,- շեշտել է ամերիկացի պաշտոնյան:
Թարգմանությունը՝ Տաթև Ֆռանգյանի
