«ՀԱՄԱՍ»-ը և «Ֆաթհ»-ը նախնական համաձայնության են եկել Գազայի կառավարման հարցով

Պաղեստինյան «Ֆաթհ» կազմակերպության ներկայացուցիչները, որը կառավարում է Հորդանան գետի արևմտյան ափը, և Գազայում տեղակայված ՀԱՄԱՍ-ի ներկայացուցիչները նախնական պայմանավորվածություն են ձեռք բերել՝ համատեղ կառավարել անկլավը հակամարտության ավարտից հետո։ Այս մասին հաղորդում են AFP-ն, Associated Press-ը և Al-Mayadeen-ը:

Կողմերը պայմանավորվել են ստեղծել կոմիտե, որը միջազգային կազմակերպությունների հետ համագործակցությամբ մարդասիրական օգնություն կտրամադրի պաղեստինցիներին։

ԶԼՄ-ները, հղում անելով համաձայնագրի նախագծին, նշում են, որ կոմիտեն բաղկացած կլինի 10-15 հոգուց (կապված չեն պաղեստինյան խմբավորումների հետ), որոնք պատասխանատու կլինեն տնտեսության, կրթության, առողջապահության, մարդասիրական օգնության և Գազայի հատվածի վերականգնման հարցերով։

Կառույցը ենթարկվելու է Պաղեստինի ինքնավարությանը, որի մեծամասնությունը «Ֆաթհ»-ի անդամներ են։ Կոմիտեն կկառավարի նաև Եգիպտոսի հետ սահմանին գտնվող «Ռաֆահ» անցակետը։

ՀԱՄԱՍ-ի ներկայացուցիչն AP-ին ասել է, որ կողմերը պայմանավորվել են ընդհանուր պայմանների շուրջ, սակայն որոշ մանրամասներ պետք է համաձայնեցվեն, այդ թվում՝ այն, թե ով է լինելու կոմիտեում: Համաձայնագիրը պետք է հաստատի Պաղեստինի նախագահ Մահմուդ Աբբասը։ Դրա համար օրվա ընթացքում «Ֆաթհ»-ի պատվիրակությունը Կահիրեից, որտեղ տեղի է ունեցել բանակցությունների հերթական փուլը, կվերադառնա Ռամալլա (քաղաք Հորդանան գետի արևմտյան ափում):

Թարգմանությունը՝ Տաթև Ֆռանգյանի