Սիրիայում զինված խմբավորումները շարունակում են նոր բնակավայրեր գրավել

Սիրիայում նախագահ Բաշար Ասադի վարչակարգի դեմ հանդես եկող զինված խմբավորումները գրավել են Համա նահանգի ևս 8 բնակավայր։ Հակակառավարական խմբավորումները, որոնք 6 օր շարունակ բախվել են Ասադի ռեժիմի զորքերի հետ, շարունակում են առաջխաղացումն ամբողջ երկրում։

Թուրքական Անադոլու գործակալության փոխանցմամբ՝ նրանք կառավարական զորքերից գրավել են Հալեպի կենտրոնի մեծ մասը և ամբողջ Իդլիբ նահանգը, վերահսկողության տակ են վերցրել Ջալիմե, Ալզեկա, Բերիդեջ, Ջուբբանե, Թալ Մելեխ, Քիրքաթ, Մուգայիր և Մաբթան բնակավայրերը Համա նահանգի հարավում, որը գտնվում է Իդլիբից հարավ։

Սիրիական ընդդիմությունը հայտնում է Ասադի ուժերի նահանջի մասին Համայի մի քանի շրջաններից դեպի Հոմս։ Նշվում է, որ քաղաքը շուտով կարող է ընկնել։

Հակակառավարական թուրքամետ զինված խմբավորումները հարձակվել են իրանամետ ուժերի վրա Համա քաղաքի կենտրոնի մոտ։ Զինված խմբավորումները գրավել էին նաև Համայի կարևորագույն շրջաններից մեկը՝ Մ5 մայրուղու վրա գտնվող Մորիկ շրջանը։

Reuters-ը, հղում անելով իր աղբյուրին, հայտնում է, որ իրանամետ լիբանանյան «Հըզբոլլահ» զինված խմբավորումը չի նախատեսում զինյալների ուղարկել Սիրիայի հյուսիս՝ սիրիական բանակին աջակցելու համար։

Հաղորդվում է, որ ռուսական ավիացիան հարվածներ է հասցրել սիրիական Իդլիբին։ Հարվածների արդյունքում ոչնչացվել են մի քանի բուժհաստատություններ, հայտնում է Սիրիայի քաղաքացիական պաշտպանությունը։ Մասնավորապես, տուժել է Իդլիբի համալսարանական հիվանդանոցը։

Թարգմանությունը՝ Տաթև Ֆռանգյանի