13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Դամասկոսում Ասադի հետ բանակցություններից հետո Իրանի ԱԳ նախարարը ժամանել է Թուրքիա
Քաղաքականություն
02.12.2024 | 14:43
Իրանի ԱԳ նախարար Աբբաս Արաղչին ժամանել է Անկարա՝ թուրք բարձրաստիճան պաշտոնյաների հետ քննարկելու երկկողմ և տարածաշրջանային հարցերը։ IRNA-ի հաղորդմամբ՝ Արաղչիին առավոտյան Անկարայի օդանավակայանում դիմավորել են թուրք և իրանցի պաշտոնյաներ, այդ թվում՝ Անկարայում Իրանի դեսպանը: Արաղչիի ծրագրված հանդիպումների օրակարգում նաև տարածաշրջանային զարգացումներն են, հատկապես՝ Սիրիայում տիրող իրավիճակը։
Հավելենք, որ Իրանի ԱԳ նախարարը Թուրքիա է ժամանել Դամասկոս կատարած այցից հետո, որտեղ կիրակի երեկոյան հանդիպել է Սիրիայի նախագահ Բաշար Ասադի հետ և ընդգծել ահաբեկչության դեմ պայքարում Թեհրանի լիակատար աջակցությունը արաբական երկրի կառավարությանն ու ժողովրդին:
Հանդիպմանը Ասադն ասել է, որ վճռական են՝ պայքարելու Սիրիայի տարածքում ահաբեկչական կազմակերպությունների դեմ։
«Սիրիացի ժողովուրդն անցած տարիներին կարողացել է դիմակայել ահաբեկչության բոլոր ձևերին, և այսօր նրանք ավելի քան վճռական են արմատախիլ անելու այն»,- նշել է նա՝ հավելելով, որ Սիրիայում ահաբեկչական խմբավորումներին արմատախիլ անելը, որոնք, ըստ նրա, ունեն արտաքին աջակցություն, կօգնի պաշտպանել տարածաշրջանի բոլոր երկրների կայունությունն ու անվտանգությունը։
Արաղչին իր հերթին փոխանցել է Իրանի բարձրաստիճան պաշտոնյաների ուղերձը, որ Իսլամական Հանրապետությունը վճռականորեն կաջակցի Սիրիային ահաբեկչության դեմ պայքարում։
Հանդիպումից հետո լրագրողների հետ զրույցում Արաղչին հայտարարել է, որ «լավ և կարևոր» հանդիպում է ունեցել Ասադի հետ և «բարեկամական ու անկեղծ» բանակցություններ վարել։
Թարգմանությունը՝ Էմմա Չոբանյանի
