30.04.2026 | 18:30
Հնդկաստանն ու Հայաստանը ռազմական տեխնիկայի համատեղ մշակում են սկսել. The Indian Express
Բլինքենն ու Ֆիդանը քննարկել են Սիրիայում զարգացումները, Հարավային Կովկասին վերաբերող հարցեր
Քաղաքականություն
02.12.2024 | 11:48
ԱՄՆ պետքարտուղար Էնթոնի Բլինքենը հեռախոսազրույց է ունեցել Թուրքիայի ԱԳ նախարար Հաքան Ֆիդանի հետ։ Թուրքական լրատվամիջոցները, վկայակոչելով ԱԳՆ-ում աղբյուրներին, հայտնում են, որ քննարկվել են Սիրիայում վերջին զարգացումները։ Ֆիդանը Բլինքենին ասել է, թե Սիրիայում «Թուրքիան դեմ է ցանկացած գործողության, որը կարող է մեծացնել անկայունությունը, և Անկարան երբեք թույլ չի տա ահաբեկչական գործողություններ սիրիացի խաղաղ բնակչության դեմ»։
Ֆիդանն ասել է, որ այս համատեքստում Թուրքիան հանդես է գալիս Սիրիայում լարվածության նվազեցման օգտին։ Նա նշել է, որ Սիրիայում խաղաղություն և հանգստություն հաստատելու համար պետք է ավարտին հասցվի վարչակարգի և ընդդիմության միջև քաղաքական գործընթացը։
Թուրքիայի ԱԳ նախարարը նաև հայտարարել է, որ Լիբանանում մշտական հրադադարի համար Իսրայելը պետք է կատարի իր պարտավորությունները։ Բացի այդ, Գազայում պետք է հնարավորինս շուտ հրադադար հաստատվի, իսկ տարածաշրջան պետք է մարդասիրական օգնություն հասցվի։
Հաղորդվում է, որ զրույցի ընթացքում կողմերը քննարկել են նաև Ուկրաինայի ու Հարավային Կովկասի հարցերը։
ԱՄՆ Պետքարտուղարությունն էլ հայտնում է, որ կողմերը քննարկել են Սիրիայում արագ զարգացող իրավիճակը։
«Պետքարտուղար Բլինքենը և արտաքին գործերի նախարար Ֆիդանը քննարկել են Հալեպում և այլուր ապաէսկալացիայի անհրաժեշտությունը և քաղաքացիական անձանց կյանքի ու ենթակառուցվածքների պաշտպանությունը»,- ասվում է հաղորդագրության մեջ։
Թարգմանությունը՝ Էմմա Չոբանյանի
