Ջո Բայդենը երկու քրեական գործով ներում է շնորհել իր որդուն՝ Հանթերին

ԱՄՆ նախագահ Ջո Բայդենը հայտարարել է իր որդուն՝ Հանթերին ներում շնորհելու որոշման մասին։ Ամերիկայի նախագահի հայտարարությունը տարածել է Սպիտակ տան մամուլի ծառայությունը։ Նախկինում ամերիկյան պետության ղեկավարը բազմիցս բացառել էր նման հնարավորությունը։

Բայդեն կրտսերին ներում է շնորհվել զենքի պահման կանոնների խախտման և հարկերից խուսափելու գործերով։ Առաջին գործով դատավճիռը սպասվում էր դեկտեմբերի 12-ին, երկրորդով՝ դեկտեմբերի 16-ին։
Ջո Բայդենն ասել է, որ կատարել է իր խոստումը` չազդելու այս դեպքում ԱՄՆ արդարադատության նախարարության աշխատանքի վրա, ինչպես նաև հույս է հայտնել, որ ամերիկացիները «կհասկանան, թե ինչու է հայրն ու նախագահը նման քայլի դիմել»։ Սպիտակ տան ղեկավարի խոսքով՝ որդու դեմ մեղադրանքները քաղաքական դրդապատճառներ ունեն։ Նա դրանք որակել է որպես իրեն «կոտրելու» փորձեր, ուստի պատճառ չուներ կարծելու, որ Բայդեն կրտսերի վրա հարձակումները կդադարեն:

Ջո Բայդենը հավելել է, որ որդուն ներում շնորհելու որոշումը կայացրել է երկար կշռադատելուց հետո, և դա պայմանավորված է ոչ միայն ընտանեկան կապերով, այլև դատավարության անարդար լինելու համոզմունքով։
«Ես հավատում եմ արդարադատությանը, բայց կարծում եմ, որ այս գործընթացում քաղաքականություն է ներթափանցել՝ հանգեցնելով արդարադատության սխալի», – ասել է ԱՄՆ նախագահը։

Ուշագրավ է, որ սեպտեմբերին Հանթեր Բայդենն իրեն մեղավոր է ճանաչել հարկային հանցագործությունների բոլոր ինը կետերով: Ամերիկյան լրատվամիջոցները գրել են, որ ազգային օրենսդրության համաձայն՝ առաջադրված մեղադրանքը նախատեսում է մինչև 17 տարվա ազատազրկում։ Բայդեն կրտսերն ավելի վաղ դատապարտվել էր երեք մեղադրանքներով Ուիլմինգթոնում՝ Դելավերում, զենքի պահման համար: Այս հանցագործության համար առավելագույն պատիժը, ըստ ԱՄՆ օրենսդրության, 25 տարվա ազատազրկումն է և 750 հազար դոլար տուգանքը։

Թարգմանությունը՝ Տաթև Ֆռանգյանի