30.04.2026 | 20:48
Մեր ազգն այժմ պետք է կենտրոնանա ներկայի և ապագայի վրա, այլ ոչ թե մնա անցյալում. Արարատ Միրզոյանի հարցազրույցը France 24-ին
Թուրքիայի քաղաքացիներին 2025թ․ հունվարից պետական հարկերի և տուրքերի կտրուկ բարձրացում է սպասվում
Քաղաքականություն
28.11.2024 | 22:53
Թուրքիայի քաղաքացիները պատրաստվում են 2025 թվականի հունվարի 1-ից սկսած պետական տուրքերի և ծառայությունների լայն շրջանակի գների բարձրացման նոր ալիքին՝ գանձապետարանի և ֆինանսների նախարարության կողմից 43,9 տոկոս վերագնահատման տոկոսադրույքի մասին հայտարարությունից հետո, գրում է Turkish Minute-ը։
Վերագնահատման դրույքաչափը տարբեր հարկերի, տուրքերի և տուգանքների նկատմամբ կիրառվող տոկոսային աճն է՝ Թուրքիայի տնտեսության մեջ գնաճի և աճող ծախսերի ճշգրտման համար, և այն հայտարարվում է ամեն տարի:
Պաշտոնական տեղեկագրում հրապարակված որոշումը նոր տարում կհանգեցնի անձնագրերի, վարորդական վկայականների, տրանսպորտային միջոցների հարկերի, ճանապարհային տուգանքների և այլ ծախսերի զգալի աճի: Կանխատեսվում է, որ վերագնահատման տոկոսադրույքը կազդի ինչպես տնային տնտեսությունների, այնպես էլ բիզնեսների վրա: Տրանսպորտային միջոցների հարկը (MTV) զգալիորեն կբարձրանա՝ տրանսպորտային միջոցների զննման վճարները 1821 լիրայից հասնելով 2621 լիրայի։
Ճանապարհային երթևեկության խախտումները կհանգեցնեն ավելի մեծ տուգանքների։ Մեքենա վարելիս բջջային հեռախոս օգտագործելը, կարմիր լույսի տակ անցնելը կամ տրանսպորտային միջոցի զննումը ձախողելը կհանգեցնի տուգանքների՝ 1506 լիրայից հասնելով 2168 լիրայի։ Ավելի լուրջ խախտումները, ինչպիսիք են առանց վկայականի մեքենա վարելը կամ առաջին անգամ ալկոհոլի ազդեցության տակ վարելը, կհանգեցնեն տուգանքների ավելացման՝ 6439-ից 9267 թուրքական լիրայի։
Երեք տարուց ավելի գործող անձնագրերի համար վճարը 7833-ից կդառնա 11274 թուրքական լիրա, իսկ արտերկրից հեռախոսների ներկրումը կարժենա 45,614 թուրքական լիրա՝ 31,692 թուրքական լիրայի փոխարեն։
Հարկային փորձագետ Օզան Բինգյոլը X-ի իր միկրոբլոգում նշել է, որ Թուրքիայի նախագահ Ռեջեփ Թայիփ Էրդողանն իրավունք ունի միջամտելու վերագնահատման դրույքաչափերին։
Թուրքիան վերջին տարիներին պայքարում է կյանքի ծախսերի խորացող ճգնաժամի հետ, որը նշանավորվում է բարձր գնաճով և արժույթի արժեզրկմամբ:
Թարգմանությունը՝ Էմմա Չոբանյանի
