14.12.2024 | 13:14
Զինված ուժերում իրավունքների պաշտպանության հետ կապված հարցերն իմ ամենօրյա ուշադրության ներքո են. ՄԻՊ
Քաղաքապետարանը դիմել է բջջային օպերատորներին՝ կարմիր գծերի վճարի խնդիրը բոլորի համար ընդունելի պայմաններով լուծելու համար
13.07.2017 | 10:38
Երևանի քաղաքապետարանը ավտոկայանատեղիների՝ sms հաղորդագրությամբ վճարը բարձրացնելու առնչությամբ հաղորդագրություն է տարածել:
«Սիրելի՛ համաքաղաքացիներ,
ս.թ. հուլիսի 7-ին «Փարկինգ Սիթի Սերվիս» ՓԲԸ-ի տարածած հայտարարությունն առ այն, որ SMS հաղորդագրության միջոցով ավտոկայանատեղի վճարի համար գանձվող գումարի փոփոխություն կարող է նախատեսվել, տեղիք տվեց հակասական մեկնաբանությունների։
Թեև արդեն իսկ պարզաբանել ենք, որ ավտոկայանատեղի վճարի չափը չի փոխվում, և խնդիրը վերաբերում է վճարման ձևաչափով պայմանավորված լրացուցիչ առաջացող գումարներին, այդուհանդերձ հարկ ենք համարում նշել, որ, որպես Երևան համայնքի շահերից հանդես եկող կառույց, Երևանի քաղաքապետարանը և ՀՀ տարածքում ծառայություն մատուցող բջջային օպերատորները մտահոգված են ստեղծված իրավիճակով։
Տեղեկացնում ենք, որ խնդրի առնչությամբ Երևանի քաղաքապետարանը գրավոր դիմել է բջջային կապի օպերատորներին՝ քննարկելու SMS հաղորդագրության միջոցով ավտոկայանատեղի վճարի գանձման ձևաչափում հնարավոր փոփոխություններ կատարելու հարցը, ինչը հնարավորություն կտա վերացնելու լրացուցիչ ԱԱՀ-ի վճարման անհրաժեշտությունը, ինչպես նաև էապես կնվազեցնի գանձման հետ կապված հավելյալ այլ ծախսերը։
Միաժամանակ այս ուղղությամբ քննարկումներ են ընթանում գործընթացի մասնակիցների, մասնագիտական խմբերի և կառույցների հետ՝ խնդրին առնչվող կողմերի հետ փոխգործակցությամբ հնարավոր լուծումներ գտնելու համար։ Նախնական քննարկումների արդյունքում ձեռք է բերվել համաձայնություն՝ խնդիրը բոլորի համար ընդունելի պայմաններով լուծելու վերաբերյալ։
Հաշվի առնելով գործընթացում ներգրավված կողմերի պատրաստակամությունը` լիահույս ենք, որ խնդիրը շուտով արդյունավետ հանգուցալուծում կունենա և վերջնական արդյունքների մասին լրացուցիչ կտեղեկացնենք»։
Նշենք, որ «Փարքինգ սիթի սերվիս» ՓԲԸ-ն օրեր առաջ իր բաժանորդներին տեղեկացրել էր sms- հաղորդագրության միջոցով ավտոկայանատեղերի վճարի գանձման գումարի ավելացման մասին։
Այս առնչությամբ հաջորդ օրը ՎիվաՍել ՄՏՍ-ը հանդես եկավ հայտարարությամբ՝ նշելով, որ կարմիր գծերի SMS-ների համար միջնորդավճարի տոկոսադրույքը մնացել է անփոփոխ: Ապա հաջորդեց Beelin-ի պարզաբանումը, ըստ որի՝ Sms-ով ավտոկայանատեղի համար վճարման ընթացակարգում փոփոխություն չի կատարվել:
