16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Ինչու է «Փարքինգ սիթի սերվիս»-ը բարձրացրել ավտոկայանատեղիների sms հաղորդագրությամբ վճարը
10.07.2017 | 17:05
«Փարքինգ սիթի սերվիս» ՓԲԸ-ն օրեր առաջ «ավետեց» իր բաժանորդներին sms- հաղորդագրության միջոցով ավտոկայանատեղերի վճարի գանձման գումարի ավելացման մասին։ Ըստ ընկերության հաղորդագրության՝ 2017 թվականի օգոստոսի 1-ից «1045 համարին SMS հաղորդագրության միջոցով ավտոկայանատեղի վճար կատարելիս հեռախոսահամարի հաշվից կգանձվի 149 դրամ գումար, որից 100 դրամ ավտոկայանատեղի վճար, 24.8 դրամ միջնորդավճար և 24.2 դրամ ԱԱՀ»։
Ստացվում է, որ եթե այժմ մեկ ժամ մեքենան կայանելու համար գանձվում է 100 դրամ, ապա օգոստոսի 1-ից սկսած՝ կգանձվի 149 դրամ, 24 ժամվա համար այժմ՝ 500 դրամ, օգոստոսի 1-ից՝ 748 դրամ։ Երևանի քաղաքապետարանը, սակայն, իր պարզաբանման մեջ հայտնել է, որ ավտոկայանատեղերի վճարման սակագնի թանկացում նախատեսված չէ․ «Գանձվող գումարի փոփոխությունը վերաբերում է SMS հաղորդագրության միջոցով գանձումն ապահովող բջջային օպերատորների միջնորդավճարներին և ավելացված արժեքի հարկին։ Հայաստանյան բջջային օպերատորները, սակայն, Factor.am-ի հետ զրույցում զարմացած ասացին, որ իրենք որևէ կերպ կապ չունեն սակագնի փոփոխության հետ։ Բիլայն-Արմենիա ընկերության օպերատորը մեզ հետ զրույցում ասաց, որ սակագինը որոշում է ՍՊԸ-ի սեփականատերը:
«Մեզ ներկայացվում է արժեքը, մենք ընդամենը կատարում ենք ծառայություն»,- ասաց ընկերության աշխատակիցը։
Վիվա-Սել-ՄՏՍ ընկերության աշխատակիցն էլ ասաց․ «Թե ինչու է փոխվել սակագինը, չեմ կարող ասել, մեզ հետ կապված չէ․մենք ընդամենը միջնորդ կազմակերպություն ենք»։
«Յուքոմ» ՍՊԸ-ից էլ ասացին, որ տեղյակ չեն վճարի փոփոխության պատճառների մասին։ Իսկ ահա «Փարքինգ սիթի սերվիս» ՍՊԸ տնօրեն Վազգեն Հարությունյանը Factor.am-ի հետ զրույցում ասաց, որ վճարի բարձրացումը պայմանավորված է այն հանգամանքով, որ ընկերությունն այլևս չի կարողանում վճարել ԱԱՀ-ն ու միջնորդավճարը:
«Նախկինում կարողանում էինք այդ գումարը վճարել, հիմա՝ չէ․հասույթը նախկինում շատ ավելի շատ էր, քան հիմա»,-պարզաբանեց ընկերության տնօրենը։ Հարությունյանը խորհուրդ տվեց իրենց բաժանորդներին օգտվել օնլայն վճարման հնարավորությունից, որի դեպքում մինչև 1000 դրամ վճարման ժամանակ միջնորդավճար չի գանձվում:
Նկատենք, սակայն, որ օնլայն վճարման տերմինալներ ամենուր չէ, որ կան: «Ցանկացած վճարային համակարգի միջոցով՝ կլինեն էլեկտրոնային կոշելյոկներ, ցանկացած տիպի օնլայն լուծումներ, կարող են առանց միջնորդավճարի վճարում կատարել»,- նկատեց Հարությունյանը` հավելելով.«Իսկ եթե sms- հաղորդագրության միջոցով են ուզում վճարել, ուրեմն միջնորդավճարը պետք է վճարեն»։
Մեր դիտարկմանը, որ սոցցանցերում արդեն դժգոհություն է բարձրացել վճարի բարձրացման պատճառով, եթե բողոքի ակցիաներ լինեն, արդյոք ընկերությունը փոխզիջումային տարբերակ կգտնի, Վազգեն Հարությունյանը պատասխանեց․ «Եթե փոխզիջման տարբերակ լիներ, ուղղակի հարցը չէր բարձրացվի»։
Սեդա Ղուկասյան
