Թուրքիայի ՊՆ-ն հայտարարել է, որ ԱՄՆ-ում փոխել են կարծիքը և պատրաստ են փոխանցել գնված F-35-երը

Թուրքիայի պաշտպանության նախարար Յաշար Գյուլերը հայտարարել է, թե ԱՄՆ պաշտոնյաները փոխել են իրենց կարծիքը F-35 կործանիչների վերաբերյալ։

«Այս պահին մենք այնտեղ ունենք 6 F-35: Երբ ամերիկացիները տեսան, որ պատրաստվում ենք կառուցել KAAN ինքնաթիռը, որ մենք կարող ենք դա անել, նրանք փոխեցին միտքը։ Հիմա հայտարարում են, որ կարող են տալ F-35-երը։ Հիմա մենք պնդում ենք, որ մեր բաժինը մեզ վերադարձնեն։ Մենք ցանկությունն ենք հայտնել գնել, ընդհանուր առմամբ, 40 F-35»,- ասել է Գյուլերը։

Նշենք, որ ԱՄՆ-ը պատժամիջոցներ էր սահմանել Անկարայի նկատմամբ և հեռացրել F-35 կործանիչների ծրագրից 2019 թվականին, երբ Թուրքիան ՌԴ-ից գնել էր C-400 ՀՕՊ համակարգերը։

Գյուլերը նաև ասել է, որ ԱՄՆ-ին նախնական վճարումը կատարվել է F-16 Block 70-ի գնման շրջանակում, ներդրել են 1,4 միլիարդ դոլար։ Ըստ նրա՝ դրանով գնելու են 40 F-16 Block 70 Viper ինքնաթիռ։

Eurofighter Typhoon կործանիչների գնման վերաբերյալ Գյուլերը հայտարարել է, որ Գերմանիան տվել է ձեռքբերման համար անհրաժեշտ թույլտվությունները, և ասել, որ ուսումնասիրությունները շարունակվում են։

Խոսելով C400 ՀՕՊ համակարգերի մասին՝ նա նշել է, որ անհրաժեշտության դեպքում՝ դրանք կարող են տեղակայվել։

«Ամեն տեղ, որտեղ մենք կտեղադրենք և կօգտագործենք C-400-ը, պարզ է։ Այն վայրերը, որտեղ դրանք կտեղակայվեն, ներառյալ դրանց տակ գտնվող նկուղները, ամեն ինչ արդեն արված է և պատրաստ։ Հենց հրաման տանք, կտեղափոխվի։ Ամբողջ համակարգը տեղադրվում է մոտավորապես 12 ժամում»,- ասել է Թուրքիայի ՊՆ ղեկավարը։

Թարգմանությունը՝ Էմմա Չոբանյանի