14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ԱՄՆ-ն հայտարարել է Ուկրաինային 275 մլն դոլարի ռազմական օգնություն հատկացնելու մասին
Քաղաքականություն
21.11.2024 | 12:07
ԱՄՆ-ն Ուկրաինային լրացուցիչ օգնության փաթեթ է տրամադրում․ Կիևը կստանա 275 միլիոն դոլարի զենք և զինտեխնիկա։ Այս մասին հայտարարել է ԱՄՆ պետքարտուղար Էնթոնի Բլինքենը, գրում է DW-ի ռուսական ծառայությունը։
Նշվում է, որ Ուկրաինային օգնության հերթական փաթեթի հատկացումը տեղի է ունենում այդ երկրին աջակցության ընդլայնման շրջանակներում, ինչի մասին սեպտեմբերի 26-ին հայտարարել էր ԱՄՆ նախագահ Ջո Բայդենը՝ Ուկրաինայի նախագահ Վլադիմիր Զելենսկիի հետ Սպիտակ տանը հանդիպման նախօրեին։
Այդ ժամանակ Բայդենը ՊՆ-ին հանձնարարել էր 5,5 միլիարդ դոլարի օգնություն ուղղել Ուկրաինա Կոնգրեսի կողմից հաստատված միջոցներից, որպեսզի մինչև իր նախագահական ժամկետի ավարտը նրա վարչակազմը կարողանա «ամբողջությամբ օգտագործել Կոնգրեսի կողմից հատկացված միջոցները՝ աջակցելու համար ամերիկյան սարքավորումների կրճատմանը հօգուտ Ուկրաինայի, իսկ հետո համալրել ԱՄՆ-ի պահուստները»։
Նույն օրը՝ սեպտեմբերի 26-ին, Սպիտակ տունը հայտնել էր, որ Պենտագոնը Կիևին 2,4 մլրդ դոլար կհատկացնի Ուկրաինայի անվտանգության աջակցության նախաձեռնության շրջանակներում։
Բլինքենը հայտարարել է, որ Ուկրաինային ռազմական օգնության հաջորդ փաթեթը ներառելու է զինամթերք HIMARS հրթիռային համակարգերի համար՝ 155 մմ և 105 մմ տրամաչափի հրետանային արկեր, 81 մմ և 60 մմ տրամաչափի ականանետներ, էլեկտրական սարքավորումներ F-16 կործանիչների համար, TOW հակատանկային կառավարվող հրթիռներ, Javelin և AT-4 հակատանկային համակարգեր, անօդաչու թռչող սարքեր, քիմիական, կենսաբանական, ճառագայթային, միջուկային զենքերից պաշտպանության միջոցներ, հակահետևակային ականներ, պահեստամասեր, օժանդակ սարքավորումներ, ծառայություններ, ուսուցում և տրանսպորտ։
Թարգմանությունը՝ Էմմա Չոբանյանի
