ՄԱԳԱՏԷ-ի ղեկավարը հնարավոր է համարել Իրանի հետ միջուկային գործարքի կնքումը

Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսսին Թեհրան կատարած այցի ընթացքում բանակցություններ է վարել Իրանի արտգործնախարար Աբբաս Արաղչիի և Ատոմային էներգիայի կազմակերպության ղեկավար Մոհամմադ Էսլամիի հետ։ Գրոսսին վստահեցրել է, որ Իսլամական Հանրապետության հետ նոր միջուկային համաձայնագրի կնքումը հնարավոր է։ Իրանի ԱԳՆ-ն ընդգծել է, որ իրենք պատրաստ են բանակցությունների, բայց ոչ ճնշման տակ։

«Մենք գիտենք, որ այս փուլում չափազանց կարևոր է հասնել կոնկրետ, շոշափելի և տեսանելի արդյունքների, որոնք ցույց կտան, որ այս համատեղ աշխատանքը բարելավում է իրավիճակը, բերում պարզություն և ընդհանուր իմաստով հեռացնում մեզ հակամարտությունից և, ի վերջո, պատերազմից»,- ասել է Գրոսսին Մոհամմադ Էսլամիի հետ համատեղ ասուլիսում, փոխանցում է Associated Press-ը:

ՄԱԳԱՏԷ-ի ղեկավարի խոսքով՝ Իրանը ցանկանում է համաձայնության գալ Արևմուտքի հետ, և դրա համար գործակալությանն անհրաժեշտ է հավաստի տեղեկատվություն երկրի միջուկային ծրագրի մասին։

Մոհամմադ Էսլամին, իր հերթին, զգուշացրել է, որ ՄԱԳԱՏԷ-ի ցանկացած բանաձև, որը ենթադրում է միջամտություն Իրանի միջուկային ծրագրին, կհանգեցնի «հակամիջոցների»։ ՄԱԳԱՏԷ-ի Կառավարիչների խորհուրդը հունիսին ընդունել է Թեհրանի գործողությունները քննադատող վերջին բանաձևը։

«Մենք շարունակում ենք լիովին համագործակցել ՄԱԳԱՏԷ-ի հետ։ Տարաձայնությունները կարող են լուծվել համագործակցության ու երկխոսության միջոցով։ Պայմանավորվեցինք շարունակել։ Մենք մտադիր ենք բանակցել՝ ելնելով մեր ազգային շահերից և անքակտելի իրավունքներից, բայց պատրաստ չենք բանակցել ճնշման կամ ահաբեկման ներքո»,- X-ում գրել է Աբբաս Արաղչին Ռաֆայել Գրոսիի հետ հանդիպումից հետո։

Գրոսսիի այցից անմիջապես առաջ Reuters-ը, հղում անելով իր աղբյուրներին, հայտնել է, որ Ֆրանսիան, Մեծ Բրիտանիան և Գերմանիան պնդում են, որ ՄԱԳԱՏԷ-ն նոր բանաձև ընդունի Իրանի դեմ՝ նրա «անարդյունավետ համագործակցության» պատճառով և դրանով իսկ ցանկանում են ստիպել Թեհրանին վերադառնալ բանակցությունների։

Թարգմանությունը՝ Տաթև Ֆռանգյանի