23.06.2026 | 13:23
Փամբակի զորամասում վարժանքների ժամանակ վնասվածք ստացած զինծառայողը վիրահատվել է․ ՊՆ
Մոլդովայի ԱԳՆ-ն բողոքի նոտա է հանձնել ՌԴ դեսպանին
Քաղաքականություն
12.11.2024 | 18:59
Մոլդովայի արտաքին գործերի նախարարությունը բողոքի նոտա է հանձնել Քիշնևում ՌԴ դեսպան Օլեգ Օզերովին՝ ընտրություններին «ապօրինի և կանխամտածված միջամտության» պատճառով։ Գերատեսչությունը նաև մեղադրել է Մոսկվային օդային տարածքը խախտելու մեջ՝ Մոլդովայի տարածքում երկու ռուսական անօդաչու թռչող սարք ընկնելու կապակցությամբ։
Միաժամանակ, Օլեգ Օզերովը հայտարարել է, որ իրեն ԱԳՆ չեն կանչել, նա եկել է «պլանավորված հանդիպման»։
Ըստ Մոլդովայի ԱԳՆ-ի՝ բողոքի նոտան տրվել է այն պատճառով, որ Ռուսաստանը փորձել է «խեղաթյուրել նախագահական ընտրությունների և հանրաքվեի արդյունքները» եվրաինտեգրման վերաբերյալ, ինչպես նաև «խարխլել և ապալեգիտիմացնել Մոլդովայի Հանրապետության ժողովրդավարական գործընթացը»։
«Միևնույն ժամանակ, ԱԳՆ-ն խստորեն դատապարտել է Մոլդովայի Հանրապետության օդային տարածքի խախտումը՝ հաշվի առնելով այն փաստը, որ նոյեմբերի 10-ին երկու ռուսական անօդաչու թռչող սարքեր են նկատվել Մոլդովայի Հանրապետության ինքնիշխան տարածքում՝ մեկը՝ Կաուզենի շրջանում և մյուսը՝ Ռիսկանիում»,- ասվում է գերատեսչության հաղորդագրության մեջ։
Մոլդովան կատարվածը համարել է «ոչ բարեկամական ժեստ»։
Մոլդովայի նախագահի ազգային անվտանգության հարցերով խորհրդական Ստանիսլավ Սեկրիերուն Ռուսաստանին մեղադրել է նոյեմբերի 3-ին կայացած երկրի նախագահական ընտրությունների երկրորդ փուլին «զանգվածային միջամտության» մեջ։ Նա մանրամասներ չի հայտնել։ Կրեմլն այս մեղադրանքներն անվանել է անհիմն։
Թարգմանությունը՝ Տաթև Ֆռանգյանի
