26.12.2024 | 22:46
Հայաստանի և Ճապոնիայի միջև եկամուտների կրկնակի հարկումը բացառող կոնվենցիա է ստորագրվել
ԵՄ ութ երկրների պատվիրակություններին Թբիլիսիում դիմավորել են ԵՄ դրոշների ներքո կազմակերպված հանրահավաքով
Քաղաքականություն
11.11.2024 | 21:13
«Daitove» շարժման անդամներն այսօր հանրահավաք են անցկացրել Թբիլիսիի նախագահական նստավայրի դիմաց։ Նրանք ողջունել են ԵՄ անդամ ութ երկրների խորհրդարանական պատվիրակությունների անդամներին, փոխանցում է News Georgia-ն։
Նշվում է, որ նպատակն էր «եվրոպացի ընկերներին ցույց տալ, որ վրաց ժողովուրդը պայքարում է գողացված ընտրությունները վերադարձնելու համար»։ Ակցիան ընթացել է նախագահ Սալոմե Զուրաբիշվիլիի մասնակցությամբ հանդիպմանը զուգահեռ։
Բանակցություններից հետո պատվիրակության որոշ անդամներ դուրս են եկել հավաքվածների մոտ՝ շփվելու նրանց հետ։ Մասնակիցները «ողջունել են Գերմանիայի Բունդեսթագի միջազգային հարաբերությունների հանձնաժողովի ղեկավար Միխայել Ռոթին՝ որպես հին ծանոթի». գարնանը նա Թբիլիսիում մասնակցել է «օտարերկրյա գործակալների» մասին օրենքի դեմ ցույցերի։
Թբիլիսի ժամանած խորհրդարականների խմբում ընդգրկված են եղել նաև Ֆինլանդիայի, Շվեդիայի, Ֆրանսիայի, Լիտվայի, Լատվիայի, Էստոնիայի և Լեհաստանի խորհրդարանների արտաքին հարաբերությունների հանձնաժողովների նախագահները։
Վրաստանի խորհրդարանի նախագահ Շալվա Պապուաշվիլին հրաժարվել է հանդիպել պատվիրակության հետ։ Որպես պատճառ նա նշել է «պատվիրակության որոշ անդամների ոչ բարյացակամ վերաբերմունքը Վրաստանի նկատմամբ» և այցը համարել է կողմնակալ։
Թարգմանությունը՝ Տաթև Ֆռանգյանի
