23.06.2026 | 06:00
ԱԱ-2026. Նորվեգիան դուրս եկավ փլեյ-օֆֆ, Հոլանդը դարձյալ դուբլն գրանցեց. ՏԵՍԱՆՅՈՒԹ
Շոլցը հայտարարել է «շուտով» Պուտինի հետ բանակցելու մտադրության մասին
Քաղաքականություն
11.11.2024 | 15:30
Գերմանիայի կանցլեր Օլաֆ Շոլցը պատրաստ է Ուկրաինայի հարցով բանակցություններ վարել ՌԴ նախագահ Վլադիմիր Պուտինի հետ՝ Կիևի և այլ կողմերի մասնակցությամբ։ Այս մասին նա ասել է գերմանական ARD հեռուստաալիքի Caren Miosga հաղորդման ժամանակ, փոխանցում է Deutsche Welle-ն։
«Այո՛, ես պատրաստվում եմ խոսել Ռուսաստանի նախագահի հետ, երբ հարմար պահը լինի։ Բայց ես պատասխանատու քաղաքական գործիչ եմ, դա միայնակ չեմ անի»,- ասել է Շոլցը՝ նշելով, որ մտադիր է «շուտով» վերսկսել բանակցությունները։
Նրա խոսքով՝ մինչ ՌԴ նախագահի հետ երկխոսություն սկսելը, մի շարք շփումներ կհաստատվեն և բանակցություններ կվարվեն այլ կողմերի, այդ թվում՝ Ուկրաինայի հետ։
«Ուկրաինան կարողացել է հույսը դնել մեզ վրա, և նա չպետք է վախենա, որ իրեն մենակ կթողնեն, սրա հետ մեկտեղ, ամեն ինչ կարվի այս պատերազմի սրումը կանխելու համար։ Եվ, իհարկե, մենք պետք է տեսնենք՝ կա՞ ճանապարհ պարզելու՝ արդյո՞ք այս պատերազմը պետք է անվերջ շարունակվի, թե՞ կարելի է գտնել դրան վերջ դնելու ուղիներ»,- ընդգծել է Գերմանիայի կանցլերը։
Երկու երկրների ղեկավարների վերջին զրույցը տեղի է ունեցել 2022 թվականի դեկտեմբերին, այն ժամանակ Շոլցը Պուտինին կոչ է արել զորքերը դուրս բերել Ուկրաինայի տարածքից և անցնել հակամարտության դիվանագիտական լուծում գտնելուն։
Թարգմանությունը՝ Տաթև Ֆռանգյանի
