07.10.2026 | 15:10
ՀՀ-ում հրթիռների արտադրության հարցի քննարկում Դելիի հետ՝ ըստ ԶԼՄ-ի // Երևանում փակ փողոցներ կլինեն․ ԼՈՒՐԵՐ
Զուրաբիշվիլին հայտարարել է, որ Վրաստանը ճգնաժամը կհաղթահարի նոր խորհրդարանական ընտրություններով
Քաղաքականություն
11.11.2024 | 16:24
Վրաստանի նախագահ Սալոմե Զուրաբիշվիլին վստահ է, որ նոր խորհրդարանական ընտրություններ անցկացնելով՝ երկիրը կկարողանա դուրս գալ ներկայիս քաղաքական ճգնաժամից։ Այս մասին Զուրաբիշվիլին հայտարարել է եվրոպական ութ երկրների խորհրդարանների արտաքին հարաբերությունների հանձնաժողովների նախագահների պատվիրակության անդամների հետ հանդիպումից հետո։
Պատվիրակության կազմում ընդգրկված են օրենսդիրներ Ֆինլանդիայից, Շվեդիայից, Ֆրանսիայից, Լիտվայից, Լատվիայից, Էստոնիայից, Լեհաստանից և Գերմանիայից։
«Դատելով [Վրաստանի] ԿԸՀ-ի ղեկավարի հայտարարություններից՝ պարզ է, թե ինչ որոշում կկայացնի ԿԸՀ-ն, այստեղ ոչ մի անակնկալ չի կարող լինել։ Մեր ընկերներն այստեղ են՝ ուղիներ գտնելու Վրաստանն այս ճգնաժամից դուրս բերելու համար։ Վրաստանը դուրս կգա այս ճգնաժամից։ Մենք կվերադառնանք նոր ընտրությունների, որպեսզի Վրաստանը ստանա լեգիտիմ խորհրդարան, լեգիտիմ կառավարություն և լեգիտիմ նոր նախագահ։ Սա մեր ճանապարհն է։ Մեր ճանապարհը կայունության, ժողովրդավարության և Եվրոպայի ճանապարհն է»,- ճեպազրույցում հայտարարել է Զուրաբիշվիլին։
Վրաստանում խորհրդարանական ընտրությունները տեղի են ունեցել հոկտեմբերի 26-ին։ Կենտրոնական ընտրական հանձնաժողովի տվյալներով՝ հաղթող է ճանաչվել իշխող «Վրացական երազանք» կուսակցությունը, սակայն ընդդիմությունը չի ընդունում ընտրությունների արդյունքներն ու բողոքի ցույցերի է դուրս եկել։
Թարգմանությունը՝ Տաթև Ֆռանգյանի
