20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Թուրքիայի և Հունաստանի ԱԳ նախարարները Արևելյան Միջերկրականի և Կիպրոսի խնդիրներն են քննարկել
Քաղաքականություն
08.11.2024 | 20:21
Թուրքիայի արտաքին գործերի նախարար Հաքան Ֆիդանը հայտարարել է, որ Անկարան և Աթենքը պետք է միասին աշխատեն՝ լուծելու իրենց խնդիրները, որոնք, նրա խոսքով, չեն սահմանափակվում արևելյան Միջերկրականի ծովային սահմանների և իրավասության շուրջ տարաձայնություններով, գրում է Daily Sabah-ը։
Աթենքում իր հույն գործընկեր Յորղոս Գերապետրիտիսի հետ համատեղ ասուլիսում Ֆիդանն ասել է, որ երկու երկրները ջանքեր են գործադրում միմյանց ավելի լավ հասկանալու կարևորագույն հարցերի շուրջ, նաև ընդգծել «իրատեսորեն» գործելու և Էգեյան ծովում իրենց խնդիրները «ճիշտ ախտորոշելու» անհրաժեշտությունը։
«Մենք կարող ենք նպաստել մեր ժողովրդի փոխադարձ բարեկեցությանը win-win՝ շահեկան քաղաքականությամբ, հատկապես այս դժվարին ժամանակաշրջանում»,- ասել է Ֆիդանը՝ նկատի ունենալով Ուկրաինայում և Պաղեստինում շարունակվող հակամարտությունները։
«Թուրքիան հավատարիմ է մնում իր դիրքորոշմանը, որ փոխանակումը պետք է արդար լինի Արևելյան Միջերկրական ծովում»,- հավելել է թուրք պաշտոնյան։
Գերապետրիտիսն իր հերթին ընդգծել է այդ հարցում Թուրքիայի և Հունաստանի դիրքորոշումների «մեծ անջրպետը» և հայտարարել. «Մենք վճռական ենք՝ քննարկելու և հնարավորինս կրճատելու այս բացը։ Հունաստանը և Թուրքիան դեռևս տարաձայնություններ ունեն իրենց ծովային սահմանների որոշման հետ կապված խնդիրների շուրջ, սակայն բանակցությունները կշարունակվեն»։
Նա վերահաստատել է Հունաստանի աջակցությունը 1974 թվականին Թուրքիայի ներխուժումից հետո բաժանված Կիպրոսում խաղաղ կարգավորմանը՝ համաձայն ՄԱԿ-ի բանաձևերի, նաև արտահայտել է Հունաստանի աջակցությունը ԵՄ-ին անդամակցելու՝ Թուրքիայի ձգտումներին։
Ֆիդանը կրկնել է Անկարայի տեսակետը, որ Կիպրոսի շուրջ վեճը լուծելու դաշնային մոդելն այլևս կենսունակ չէ՝ կոչ անելով լուծել երկու պետությունների տարբերակը։
Թարգմանությունը՝ Էմմա Չոբանյանի
