26.06.2026 | 21:09
Իրանը վերահաստատել է Հորմուզի նեղուցում նավագնացությունը վերահսկելու իր իրավունքը ու զգուշացրել Պարսից ծոցի երկրներին
Մինչև տարեվերջ շահագործման կհանձնվի Ծովագյուղի երիտասարդական կենտրոնը
08.11.2024 | 13:45
ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանն այցելել է ԿԳՄՍ նախարարության աջակցությամբ ստեղծված Իջևանի և Դիլիջանի երիտասարդական կենտրոններ, ինչպես նաև ծանոթացել Գեղարքունիքի մարզի Ծովագյուղ բնակավայրում նոր կառուցվող կենտրոնի շինարարական աշխատանքների ընթացքին։
Այցի շրջանակում ԿԳՄՍ նախարարի տեղակալը տեղում ծանոթացել է կենտրոնների գործունեությանը, արված աշխատանքներին ու իրականացված ծրագրերին, ինչպես նաև քննարկել առաջիկայում նախատեսված անելիքները։
«Մեզ համար առաջնային պահանջ է երիտասարդական կենտրոններում իրականացնել այնպիսի ծրագրեր, որոնք առավելագույն հնարավորություններ կստեղծեն համայնքների երիտասարդների՝ նոր հմտությունների ձեռքբերման, կարողությունների զարգացման, ինտելեկտուալ ժամանցի ապահովման նպատակով։ Կենտրոնը նաև պետք է լինի իրազեկվածության բարձրացման, խնդիրների բարձրաձայնման և դրանց լուծման ուղիների փնտրման հարթակ, որը մի վայրում կհամախմբի երիտասարդներին»,- ասել է Արթուր Մարտիրոսյանը։
Այցի հաջորդ կանգառը Դիլիջանի «Դուկո» երիտասարդական կենտրոնն էր, որը գործում է 2024 թվականի գարնանից։ Կենտրոնի աշխատակիցները սահիկաշարով ներկայացրել են այս ընթացքում իրականացված միջոցառումները և երիտասարդների մասնակցայնությունը՝ թվային տվյալներով։ ԿԳՄՍ նախարարի տեղակալին ներկայացվել է նոր ստուդիա հիմնելու տարածքը, որտեղ հաջորդ շաբաթվանից նկարահանվելու է «Դիլիձայն» հաղորդաշարը։ Այցի ընթացքում կենտրոնում գտնվող երիտասարդներն արդեն իսկ զբաղվում էին նկարահանման ընթացիկ աշխատանքներով։ Հանդիպմանը քննարկվել են նաև կենտրոնի գործունեությանը վերաբերող առանցքային հարցեր։
Նախարարի տեղակալի վերջին կանգառը Գեղարքունիքի մարզի Ծովագյուղ բնակավայրն էր, որտեղ մինչև տարեվերջ շահագործման կհանձնվի ԿԳՄՍ նախարարության աջակցությամբ հիմնվող 5-րդ երիտասարդական կենտրոնը։
ԿԳՄՍ նախարարի տեղակալ Արթուր Մարտիրոսյանին ներկայացվել են կենտրոնի շինարարական աշխատանքները, որոնք արդեն ավարտական փուլում են։ Արթուր Մարտիրոսյանը ծանոթացել է կենտրոնի տարածքին, առկա պայմաններին, գույքային հագեցվածությանը, ինչպես նաև հեռահար ծրագրերին, որոնք իրականացվելու են կենտրոնում։ Քննարկվել են ընթացիկ հարցեր, նախանշվել են լուծման ուղիները։
Նշենք, որ բացի Իջևանից ու Դիլիջանից՝ երիտասարդական կենտրոններ են գործում նաև Ապարանում և Մեղրիում։
