26.05.2026 | 23:35
Վաղը առավոտյան ՀՀ ԶՈՒ ավիացիան Երևանի կենտրոնում կատարելու է թռիչք. ՊՆ
Ահաբեկչության մեղադրանքով 5 տարվա ազատազրկման դատապարտված դպրոցականի պատժաչափը կրճատել են 24 օրով
Քաղաքականություն
07.11.2024 | 22:50
ՌԴ ռազմական վերաքննիչ դատարանը ուժի մեջ է թողել 16-ամյա Արսենի Տուրբինի դատավճիռը, որը 5 տարվա ազատազրկման էր դատապարտվել ահաբեկչական կազմակերպությանը մասնակցելու մեղադրանքով, հաղորդում է Mediazona-ն՝ վկայակոչելով դպրոցականի մորը՝ Իրինա Տուրբինային։
Նրա խոսքով՝ դատարանը Տուրբինի պատիժը կրճատել է 24 օրով, քանի որ «ի սկզբանե պատիժը հաշվի չի առել հիվանդանոցային հետազոտության համար անցկացրած ժամանակը», սակայն պատժաչափում մնացած ամեն ինչ մնացել է անփոփոխ։
Հունիսին 2-րդ Արևմտյան շրջանի զինվորական դատարանն Արսենի Տուրբինին դատապարտել է 5 տարվա ազատազրկման ուղղիչ գաղութում՝ ահաբեկչական կազմակերպությանը մասնակցելու մեղադրանքով։ Դատավճիռը կայացնելու պահին դպրոցականը 15 տարեկան է եղել։
Ըստ մեղադրող կողմի՝ 2023 թվականի ամռանը Տուրբինը միացել է Ռուսաստանի Ազատության լեգեոնին, որից հետո, իբր, կատարել է այս կազմակերպության ներկայացուցչի ցուցումները՝ փոստարկղերում տարածելով Վլադիմիր Պուտինին քննադատող թռուցիկներ։ Դպրոցականը պնդել է, որ ինքը չի միացել լեգեոնին, իսկ թռուցիկներ տարածել է՝ ելնելով անձնական համոզմունքներից։
Հոկտեմբերի սկզբին դպրոցականը բողոքել էր, որ Մոսկվայի թիվ 5 «Վոդնիկ» քննչական մեկուսարանում իրեն ենթարկում են հոգեբանական ճնշումների և ծեծի, որտեղ նրան պահել են մինչև դատավճռի դեմ իր բողոքի քննարկումը։
«Մեմորիալ» իրավապաշտպան նախագիծը Տուրբինին ճանաչել է որպես քաղբանտարկյալ։
Թարգմանությունը՝ Տաթև Ֆռանգյանի
