Թուրքիան Թրամփի նախագահության օրոք ԱՄՆ-ի կողմից մասքատուրքերի իջեցում է ակնկալում

Թուրքիան ակնկալում է, որ Դոնալդ Թրամփի նախագահության օրոք Սպիտակ տունը կիջեցնի իր պողպատի և տեքստիլի արտահանման մաքսատուրքերը, հայտարարել է Թուրքիայի առևտրի նախարար Օմեր Բոլաթը։ Այս հայտարարությունն արվել է՝ մինչ լիրան և թուրքական ակտիվները շարունակում են աճել ԱՄՆ նոր տնտեսական քաղաքականության հեռանկարների ֆոնին, գրում է Reuters-ը։

«Մենք ակնկալում ենք, որ մաքսատուրքերը կկրճատվեն մեր արտաքին առևտրում, հատկապես, պողպատի և տեքստիլ ապրանքների համար»,- ասել է Բոլաթը AHaber հեռուստաընկերությանը տված հարցազրույցում:

Նշվում է, որ ԱՄՆ նախագահական ընտրություններում Թրամփի հաղթանակը նպաստել է թուրքական լիրայի 0,4%-ի աճին՝ հասնելով մեկ դոլարի դիմաց 34,2-ի, ինչը հոկտեմբերի կեսերից ի վեր ամենաբարձր մակարդակն է:

Ներդրողներն ու բանկիրներն ասում են, որ Գազայում և Ուկրաինայում խաղաղություն հաստատելու՝ Թրամփի հայտարարած քաղաքականությունը, հավանաբար, կօգնի Անկարայի տնտեսական շրջադարձի ծրագրին, որը մասամբ ապավինում է արտասահմանյան ներհոսքերին։

Լրատվամիջոցն ընդգծում է, որ Թրամփի խոստացած առևտրային և ներգաղթի քաղաքականությունը նույնպես կարող է Թուրքիային համեմատաբար անվնաս թողնել զարգացող շուկայական խոշոր տնտեսությունների մեջ, ինչպիսիք են Բրազիլիան, Մեքսիկան և Չինաստանը։

Բոլաթը նշել է՝ ակնկալում են, որ Թրամփի նախագահության երկրորդ ժամկետը օգուտ կբերի Թուրքիայի պաշտպանական արդյունաբերության կարիքներին՝ չնայած ԱՄՆ նախկին պատժամիջոցներին, որոնք սահմանվել էին Թրամփի առաջին ժամկետի ընթացքում: Թուրք նախարարը նաև հավելել է, որ ակնկալում է՝ ազդեցությունը բանկերի վրա կթուլանա՝ կապված Ռուսաստանի նկատմամբ Վաշինգտոնի ներկայիս էմբարգոյի հետ:

Թարգմանությունը՝ Էմմա Չոբանյանի