18.07.2026 | 19:00
Wildberries-ը 2 մլն ռուբլի կվճարի ԱԹՍ-ների հարձակման հետևանքով զոհվածների ընտանիքներին, կփոխհատուցի նաև վաճառողների վնասները
Այսօր առավոտյան Եվրոպան արթնացել է անհանգստությամբ․ ԵԽ պատգամավորը՝ ԱՄՆ ընտրությունների մասին
Քաղաքականություն
06.11.2024 | 12:19
Եվրախորհրդարանի պատգամավոր, անվտանգության և պաշտպանության հարցերով ենթահանձնաժողովի նախագահ Նատալի Լուազոն X-ում արված գրառմամբ անդրադարձել է ԱՄՆ-ում նախագահական ընտրությունների արդյունքներին։
«Այսօր առավոտյան Եվրոպան արթնացել է անհանգստությամբ։ Ժամանակն է, որ նա պարզապես արթնանա։ Եվրոպան ավելի ու ավելի քի՞չ նշանակություն ունի Ամերիկայի համար: Նա ստիպված կլինի ավելի ու ավելի շատ հույսը դնել իր վրա: Միավորվելով՝ Եվրոպան կընտրի իր ճակատագիրը, պառակտվելով՝ կտուժի»,- գրել է Լուազոն։
Հիշեցնենք, որ դեռևս այս տարվա հունվարին Նատալի Լուազոն գրառում էր կատարել՝ անդրադառնալով Դոնալդ Թրամփի այն հայտարարությանը, որ ընտրվելու դեպքում մտադիր է լքել ՆԱՏՕ-ն ու եթե Եվրոպայի վրա հարձակվեն, ապա ինքը չի օգնի։ «Եթե Թրամփն իսկապես ասել է, որ չի օգնի Եվրոպային, եթե հարձակման ենթարկվի և մտադիր է լքել ՆԱՏՕ-ն, ապա եվրոպական ռազմավարական ինքնավարությունն ու պաշտպանությունն ավելի հրատապ են, քան երբևէ։ Աշխատանքը սկսվել է, պետք է արագացնել, շտապ»,- գրել էր ԵԽ պատգամավորը։
Նշենք, որ ըստ CNN-ի հրապարակած նախնական տվյալների՝ Թրամփն առաջատար է բոլոր յոթ տատանվող նահանգներում։
Թեև ԱՄՆ-ում նախագահական ընտրությունների վերջնական արդյունքները դեռ չեն հրապարակվել, սակայն Թրամփն արդեն իսկ հայտարարել է, որ ինքն է ԱՄՆ 47-րդ նախագահը։
Թարգմանությունը՝ Անահիտ Խաչատրյանի
