19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ադրբեջանը 4,7 մլն դոլար է վճարել լոբբիստներին՝ COP29-ից առաջ իր «ավտորիտար իմիջը մաքրելու» համար․ Democracy for Sale
Քաղաքականություն
04.11.2024 | 22:14
Ավստրալական Democracy for Sale կազմակերպությունը հետաքննություն է հրապարակել, որում ասվում է, որ Ադրբեջանը 4,7 միլիոն դոլար է վճարել Teneo միջազգային խորհրդատվական ընկերությանը՝ «օգնելու Ադրբեջանի ավտորիտար վարչակարգին բարելավել իր իմիջը ՄԱԿ-ի կլիմայական գագաթնաժողովից առաջ»:
Նշվում է, որ բրիտանացի բարձրաստիճան քաղաքական գործիչների և նավթարդյունաբերության հետ սերտ կապեր ունեցող լոբբիստական ընկերությանը վճարվել է 4,7 միլիոն դոլար՝ օգնելու Ադրբեջանի ավտորիտար վարչակարգին բարձրացնել իր իմիջը ՄԱԿ-ի COP կլիմայական գագաթնաժողովից առաջ: Լոբբիստական Teneo հսկան, որում աշխատում է Լեյբորիստական կուսակցությունից մշակույթի նախկին նախարար Բեն Բրեդշոուն, որը նաև Բորիս Ջոնսոնի բիզնեսի նախկին ղեկավարն է, ստացել է յոթամսյա պայմանագիր, որը, ըստ ամենայնի, օգնելու է նավթով հարուստ պետությանը «մաքրել» իր հեղինակությունը:
Democracy for Sale-ի կողմից iPaper-ի և SourceMaterial-ի հետ համատեղ իրականացված հետաքննությունը պարզել է, որ Teneo-ի պայմանագրով նախատեսվում է Մեծ Բրիտանիայի խորհրդատուներից մեկին վճարել «ամսական 25,000 դոլար՝ գումարած բոնուսները, ընդհանուր՝ 50,000 դոլարի չափով»։
Teneo-ի լոբբիստական թիմը ներառում է Բորիս Ջոնսոնի նախկին գլխավոր բիզնես խորհրդատու Ալեքս Հիքմանին։ Ըստ ԱՄՆ փաստաթղթերի՝ Teneo-ն կտրամադրի «մեդիա ուսուցում» և խորհուրդներ կտա «պատմությունների զարգացման» վերաբերյալ COP գագաթնաժողովը հյուրընկալողներին: Լոբբիստական ընկերության աշխատանքը կղեկավարի դրա Գլոբալ ռազմավարության նախագահ Ջեֆ Մորելը, որը նավթային հսկա BP-ի նախկին ղեկավարն է։ Վերջինն իր հերթին Ադրբեջանի ամենամեծ օտարերկրյա ներդրողն է:
Կլիմայական արշավի խմբերը մեղադրել են Teneo-ին Ադրբեջանին օգնելու համար՝ «մաքրելու» իր իմիջը:
«Այն ընկերությունները, որոնք օգնում են նավթային պետություններին, ինչպիսին է Ադրբեջանը, մեղսակից են նրանց իմիջի մաքրմանը», ասել է Global Witness-ի ավագ հետաքննող Լելա Սթենլին։
«Հստակ շահերի բախում է, երբ PR ընկերությանը վճարվում է ինչպես նավթի, այնպես էլ գազի հաճախորդներին սպասարկելու համար, որոնք նպաստում են կլիմայական ճգնաժամին, և ընդունող կառավարությանը, որը հանձնարարված է վերահսկել առաջիկա միջազգային կլիմայական բանակցությունները»,- իր հերթին ասել է Մտահոգ գիտնականների միության ակտիվիստ Քեթի Մալվին։
Ադրբեջանը մեղադրվում է մարդու իրավունքների և լրատվամիջոցների ազատության դեմ ճնշումներն ուժեղացնելու համար՝ այն բանից հետո, երբ ընտրվել է որպես կլիմայական աշխարհի ամենակարևոր համաժողովը հյուրընկալող երկիր։
Նշվում է, որ 2011 թվականին ԱՄՆ նախագահ Բիլ Քլինթոնի նախկին օգնականի կողմից հիմնադրված Teneo-ն, որի կենտրոնակայանը գտնվում է Նյու Յորքում, արագորեն վերածվել է Արևմուտքի ամենամեծ լոբբիստական ընկերություններից մեկի: Այս զարգացումը հիմնականում տեղի է ունեցել ավելի փոքր լոբբիստական կազմակերպությունների ձեռքբերման հաշվին, ներառյալ՝ Tulchan Communications-ը, որը ստեղծվել է Պահպանողական կուսակցության նախկին նախագահ Էնդրյու Ֆելդմանի կողմից: Բարոն Ֆելդմանը շարունակում է մնալ Teneo-ի լոբբիստ՝ ղեկավարելով ընկերության Մեծ Բրիտանիայի ռազմավարությունը և հաղորդակցության բիզնեսը, իսկ հաճախորդների թվում են Thames Water-ը, Severn Trent-ը և McDonalds-ը:
Թե՛ Teneo-ն, թե՛ Ադրբեջանի կառավարությունը հրաժարվել են մեկնաբանություններ տալ։
Թարգմանությունը՝ Էմմա Չոբանյանի
