07.10.2026 | 12:36
ՌԴ-ն հրթիռներով ու ԱԹՍ-ներով զանգվածային հարված է հասցրել Ուկրաինային․ զոհեր և վիրավորներ կան
Իրանը «հզոր և համալիր» հարձակում է նախապատրաստում Իսրայելի վրա՝ բանակի մասնակցությամբ. WSJ
Քաղաքականություն
04.11.2024 | 12:08
Իրանը «հզոր և համալիր» հարձակում է ծրագրում Իսրայելի վրա, որի ընթացքում օգտագործվելու են ոչ միայն հրթիռներ և անօդաչու թռչող սարքեր, այլև կանոնավոր բանակը։ Այս մասին հայտնում The Wall Street Journal-ը՝ վկայակոչելով Իրանի և արաբական երկրների պաշտոնյաներին, փոխանցում է DW-ի ռուսական ծառայությունը։
Լրատվամիջոցի իրանական աղբյուրի խոսքով՝ Իսրայելի վրա նոր հարձակումն իրականացվելու է նոյեմբերի 5-ին ԱՄՆ-ում կայանալիք նախագահական ընտրություններից հետո, սակայն մինչ նոր նախագահի երդմնակալությունը՝ 2025 թվականի հունվարը։ Պաշտոնյան նշել է, որ Թեհրանը կարող է հարձակվել Իսրայելի վրա, այդ թվում՝ Իրաքի տարածքով, ինչպես նաև հարվածել իսրայելական ռազմական օբյեկտներին «շատ ավելի ագրեսիվ, քան նախորդ անգամ»։
Իրանը մտադիր է հարձակման ժամանակ օգտագործել ոչ միայն Իսլամական հեղափոխության պահապանների կորպուսը, այլև կանոնավոր բանակի զինվորներին։ Լրատվամիջոցի զրուցակիցները, սակայն, հստակեցրել են, որ խոսքն Իսլամական հեղափոխության պահապանների կորպուսին աջակցելու մասին է, այլ ոչ թե տարածաշրջանում զորքերի ամբողջական տեղակայման։
«Մեր զինվորականները մարդիկ են կորցրել, պետք է արձագանքել»,- ասել է իրանական աղբյուրը։
Իրանի իշխանությունների տվյալներով՝ հոկտեմբերի վերջին իսրայելական հարձակման հետևանքով չորս իրանցի զինվոր է զոհվել:
Հիշեցնենք՝ լույս հոկտեմբերի 26-ի գիշերը Իսրայելի բանակը մի շարք ավիահարվածներ է հասցրել Իրանի տարածքին՝ ի պատասխան ավելի վաղ իրանական կողմի իրականացրած հարձակման։
Թարգմանությունը՝ Էմմա Չոբանյանի
