ՀՀ նախագահը շնորհավորել է Միրզոյանին ու Սիմիդյանին՝ COP17-ը Հայաստանում անցկացնելու համար

ՀՀ նախագահ Վահագն Խաչատուրյանը, որ մասնակցում է Կոլումբիայի Կալի քաղաքում անցկացվող Կենսաբազմազանության մասին կոնվենցիայի Կողմերի 16-րդ համաժողովին՝ COP16-ին, երբ քվեարկության արդյունքներով հայտնի է դարձել, որ հաջորդ համաժողովը՝ COP17-ը, անցկացվելու է Հայաստանում, զանգահարել է ՀՀ արտաքին գործերի և շրջակա միջավայրի նախարարներին ու շնորհակալություն հայտնել գերատեսչությունների արդյունավետ աշխատանքի համար։

«Կոլումբիայի Կալի քաղաքում անցկացվող Կենսաբազմազանության մասին կոնվենցիայի Կողմերի 16-րդ համաժողովի (COP16) եզրափակիչ լիագումար նիստի քվեարկության արդյունքներով քվեարկության մասնակից երկրների ձայների մեծամասնությամբ որոշում է կայացվել 2026 թվականին կայանալիք համաժողովն (COP17) անցկացնել Հայաստանի Հանրապետությունում։

Այս կապակցությամբ Հանրապետության նախագահ Վահագն Խաչատուրյանը հեռախոսազրույցներ է ունեցել ՀՀ շրջակա միջավայրի նախարար Հակոբ Սիմիդյանի և ՀՀ արտաքին գործերի նախարար Արարատ Միրզոյանի հետ:

Նախագահը շնորհավորել և շնորհակալություն է հայտնել նախարարներին բարձր մակարդակի միջազգային համաժողովը Հայաստանում անցկացնելու որոշման կայացման գործում երկու նախարարությունների թիմերի ցուցաբերած համակցված և արդյունավետ աշխատանքի համար:

Նախագահ Վահագն Խաչատուրյանը նաև հաջողություններ է մաղթել հանձնառու գերատեսչություններին 2026 թվականին Կենսաբազմազանության մասին կոնվենցիայի Կողմերի 17-րդ համաժողովը բարձր մակարդակով կազմակերպելու և անցկացնելու գործում»,- ասված է ՀՀ նախագահի աշխատակազմի տարածած հաղորդագրությունում։