09.09.2026 | 17:23
ԱՄՆ-ն չինական ընկերություններին մեղադրել է ամերիկյան արհեստական բանականության տեխնոլոգիաները պատճենելու մեջ
ԱՄՆ իշխանությունները հայտնել են, որ ՌԴ-ն Կուրսկի շրջան է տեղափոխել հյուսիսկորեացի 8 հազար զինծառայողի․ AP
Քաղաքականություն
01.11.2024 | 13:03
ԱՄՆ-ին հայտնի է դարձել, որ Ռուսաստանի Կուրսկի մարզում արդեն մոտ 8,000 հյուսիսկորեացի զինվոր կա, որոնք վերապատրաստվում են՝ օգնելու ռուսական բանակին Ուկրաինայի դեմ պայքարում։ Այս մասին ՄԱԿ-ի Անվտանգության խորհրդի նիստի ժամանակ ասել է ԱՄՆ մշտական ներկայացուցչի տեղակալ Ռոբերտ Վուդը, հայտնում է AP-ն։
«Եվ ես հարց ունեմ իմ ռուս գործընկերոջը․ Ռուսաստանը դեռ պնդո՞ւմ է, որ ԿԺԴՀ-ի զորքեր չկան Ռուսաստանում»,– հավելել է նա։
Հանդիպմանը ներկա ՌԴ փոխդեսպան Աննա Եվստիգնեևան հրաժարվել է պատասխանել։
Հյուսիսային Կորեայի զորքերը դեռևս չեն մասնակցել Ուկրաինայի զինված ուժերի հետ մարտերին, սակայն Միացյալ Նահանգները կանխատեսում է, որ դա «տեղի կունենա մոտ օրերս», նշել է ԱՄՆ պետքարտուղար Էնթոնի Բլինքենը Պենտագոնի ղեկավար Լլոյդ Օսթինի և իրենց հարավկորեացի գործընկերների հետ համատեղ ճեպազրույցում։
Օսթինն իր հերթին հավելել է, որ Ռուսաստանը սովորեցնում է հյուսիսկորեացի զինվորներին հրետանու, անօդաչու թռչող սարքերի և «հիմնական հետևակային գործողությունների» կիրառում, ներառյալ՝ խրամատների մաքրում: Նրա խոսքով՝ դա վկայում է Կրեմլի հաստատակամ մտադրության մասին՝ օգտագործել հյուսիսկորեական ուժերն առաջնագծում։
Ավելի վաղ Financial Times-ը, հղում անելով ուկրաինական հետախուզության աղբյուրներին, գրել էր, որ ԿԺԴՀ-ի շուրջ երեք հազար զինվորականներ տեղակայված են Կուրսկի շրջանում՝ Ուկրաինայի հետ սահմանից 50 կիլոմետր հեռավորության վրա, և Կիևը մոտ ապագայում կանխատեսում է հյուսիսկորեացի զինվորների ներխուժում։ Նույն բանի մասին է խոսել նաև Ուկրաինայի Պաշտպանության նախարարության հետախուզության գլխավոր վարչության պետ Կիրիլ Բուդանովը։
Թարգմանությունը՝ Տաթև Ֆռանգյանի
