Քաղաքականություն
01.11.2024 | 11:25
Այն, որ Հայաստանում Ֆրանսիայի դեսպան Օլիվիե Դըկոտինյին, որը չի պահպանում դիվանագիտական էթիկետի տարրական կանոնները, ավելի շատ կենտրոնացած է Ադրբեջանի դեմ զրպարտչական արշավի վրա, քան հայ-ֆրանսիական հարաբերությունների, առաջին հերթին հանդիսանում է ֆրանսիական արտաքին քաղաքականության ձախողման արդյունք։ Այս մասին հայտարարել է Ադրբեջանի ԱԳՆ խոսնակ Այխան Հաջիզադեն ՝ մեկնաբանելով Ֆրանսիայի դեսպանի հարցազրույցը Hetq.am լրատվամիջոցին։
«Հարցազրույցի ընթացքում հնչեցված քննադատություններն Ադրբեջանի տարածքում օկուպացիային և անջատողականությանը վերջ դրած միջոցառումների մասին, միջազգային դատարանի որոշումների սխալ մեկնաբանումը, «կես խաղաղության» մասին Հայաստանի գաղափարներին աջակցող հայտարարությունները և մի շարք այլ անհեթեթ մոտեցումներ ևս մեկ անգամ ցույց են տալիս, թե ինչպես է ֆրանսիական կողմը խեղաթյուրում իրողությունները, և որ շահագրգռված չէ տարածաշրջանում կայուն և իրական խաղաղության կառուցմամբ»,- ասել է Հաջիզադեն։
Նա նշել է, թե, իբր, «Ֆրանսիայի վարքագիծը և սադրանքները, որոնք ուղղված են տարածաշրջանում էսկալացիայի պահպանմանը, ապացուցում են այդ երկրի մտադրությունների և նրա քաղաքականության իրական էությունը հակամարտության և հետհակամարտային շրջանում»:
Թարգմանությունը՝ Էմմա Չոբանյանի
