Վրաստանում քվեաթերթիկների զանգվածային լցոնման գործով երկու անձ է ձերբակալվել

Վրաստանի ոստիկանությունը հայտարարել է հոկտեմբերի 26-ին կայացած խորհրդարանական ընտրությունների ժամանակ Մառնեուլիում քվեաթերթիկների զանգվածային լցոնումների գործով երկու անձի ձերբակալության մասին։ Երկրի Կենտրոնական ընտրական հանձնաժողովը չեղյալ է համարել այս տեղամասում քվեարկության արդյունքները հենց ընտրությունների օրը՝ այն բանից հետո, երբ միջադեպի կադրերը հայտնվել են սոցիալական ցանցերում։ Տեսանյութում Մառնեուլիի քաղաքային խորհրդի անդամ Ռովշան Իսկանդերովն է, որը ներկայացնում է իշխող «Վրացական երազանք» կուսակցությունը տեղական ինքնակառավարման մարմինում։

Ձերբակալության նախօրեին նա հայտարարել էր, որ ընդդիմադիրների սադրանքների զոհ է դարձել։ Ըստ Իսկանդերովի՝ նրանք «չլսված լկտիությամբ խախտել են ընտրական կանոնները», «զբաղվել են ընտրատեղամասում քարոզչությամբ և թույլ չեն տվել «Վրացական երազանքի» պոտենցիալ ընտրողներին քվեարկել քվեատուփի մեջ»:

«Ես չկարողացա զսպել իմ էմոցիաները և վրդովված ձեռքից խլեցի քվեաթերթիկներն ու գցեցի քվեատուփի մեջ»,- գրել է Իսկանդերովը ֆեյսբուքյան իր էջում։

Նրա այս գրառումը, սակայն, այժմ անհասանելի է։

Հիշեցնենք, որ 2024 թվականի հոկտեմբերի 26-ին Վրաստանում կայացած խորհրդարանական ընտրությունների արդյունքների հնարավոր կեղծման մասին հայտարարությունների կապակցությամբ Վրաստանի նախագահ Սալոմե Զուրաբիշվիլին այսօր հրավիրվել է դատախազություն։ Նա, սակայն, հայտարարել է, որ մտադիր չէ ներկայանալ քննչական վարչություն, գրում է Գրուզիա օնլայնը։

«Ցանկանում եմ ներկայացնել իմ պատասխանը Դատախազության խնդրանքին. այն, որ ես պետք է ներկայացնեմ ապացույցներ, որոնք հաստատում են անցյալ ընտրությունների արդյունքներով իմ հայտարարությունները, արդարացված չէ (հավաստի չեն), քանի որ դատախազությունը պետք է իր հետաքննությունը կատարի, դրա համար էլ այն դատախազություն է։ Այն ապացույցները, որոնք կան հասարակության մեջ, չպետք է ներկայացվեն նախագահի կողմից։ Հասարակական կազմակերպություններն ու դիտորդներն ամեն օր ներկայացնում են հսկայական քանակությամբ ապացույցներ և գնալով ավելի ու ավելի են ցույց տալիս, թե որքան մասշտաբային, զանգվածային և համակարգված են եղել ընտրակեղծիքները»,- ասել է Զուրաբիշվիլին՝ հայտարարելով, թե դատախազությունը պետք է հսկայական աշխատանք կատարի, որպեսզի հետաքննի այն, ինչ դրված է իր սեղանին։

Թարգմանությունը՝ Տաթև Ֆռանգյանի