09.09.2026 | 12:23
Ուկրաինական ԱԹՍ-ները գրոհել են Նովոռոսիյսկը․ զոհվել է 4, վիրավորվել՝ 29 մարդ
Գերմանիան հետ է կանչել Իրանում իր դեսպանին
Քաղաքականություն
31.10.2024 | 15:46
Իրանում Գերմանիայի դեսպան Մարկուս Պոտցելը Գերմանիայի և Իրանի քաղաքացի Ջամշիդ Շարմահդի մահապատժից հետո հետ է կանչվել Բեռլին՝ «խորհրդակցությունների համար»։ Այս մասին հայտնել է dpa գործակալությունը՝ վկայակոչելով Գերմանիայի ԱԳՆ ներկայացուցչին։
Թե կոնկրետ որքան ժամանակ Պոտցելը կբացակայի Իրանից, հայտնի չէ։ Միաժամանակ, հայտարարության մեջ ասվում է՝ Թեհրանը գիտեր, որ «մոտ ապագայում» պետք է ակնկալի պատասխան միջոցներ, եթե Շարմահդը մահապատժի ենթարկվի, գրում է DW-ի ռուսական ծառայությունը։
«Ակնհայտ է նաև, որ սա լուրջ հետևանքներ կունենա ԵՄ-ի և Իրանի հարաբերությունների վրա»,- ասել է նախարարության ներկայացուցիչը՝ հավելելով, որ ԵՄ-ն «կքննարկի Իրանի ռեժիմի դեմ պատժամիջոցների հարցը»։
Ավելի վաղ Գերմանիայի ԱԳ նախարար Անալենա Բերբոքը նույնպես դատապարտել էր Ջամշիդ Շարմահդի մահապատիժը և Թեհրանին «լուրջ հետևանքներով» սպառնացել։
Իրանցի Ջամշիդ Շարմահդը, որը նաև Գերմանիայի քաղաքացիություն ուներ, մահապատժի է ենթարկվել։ Մինչև վերջ իրավապաշտպանները, հատկապես՝ ԱՄՆ-ում բնակվող Շարմահդի դուստրը պայքարում էին դատապարտյալին փրկելու համար։
Շարմահդի հարազատների խոսքով՝ նա վերջին մի քանի տարիներին բնակվում էր ԱՄՆ-ում և առևանգվել էր Իրանի հետախուզության աշխատակիցների կողմից 2020 թվականին Դուբայում՝ թռիչքի ժամանակ։ Թեհրանը նրան համարում էր Իրանում ահաբեկչական ճանաչված «Թոնդար» ընդդիմադիր խմբավորման առաջնորդը։
Թարգմանությունը՝ Տաթև Ֆռանգյանի
