30.04.2026 | 21:27
Այսօրվա փաստաթղթի ստորագրումը նշանակալի քայլ է գյուղական զարգացման ամրապնդման ճանապարհին. Պապոյան
Ստամբուլում ընդդիմադիր քաղաքապետի գլխավորությամբ կառավարության հրաժարականի կոչով բողոքի ցույց է անցկացվել
Քաղաքականություն
31.10.2024 | 13:51
Ստամբուլի դատարանը կալանավորել է Թուրքիայի գլխավոր ընդդիմադիր Ժողովրդահանրապետական կուսակցությունից (CHP) Էսենյուրթի շրջանի քաղաքապետ Ահմեդ Օզերին՝ Քուրդիստանի աշխատավորական կուսակցության (PKK) զինված ահաբեկչական կազմակերպությանն անդամակցելու մեղադրանքով։ Օզերը ձերբակալվել էր երեկ առավոտյան իր տանն իրականացված խուզարկությունից հետո։
Ստամբուլի բնակիչները գիշերը բողոքի ցույց են անցկացրել Չաղլայանի դատարանի մոտ, ուր բերվել է շրջանի ղեկավարը։ Դատարանի շենքի դիմաց հավաքվածները վանկարկել են՝ «Կալանքներն ու ձերբակալությունները մեզ չեն վախեցնի», նաև կառավարության հրաժարականի կոչեր հնչեցրել։ Հավաքի ժամանակ նաև հնչել են «Իմամօղլու, նախագա՛հ» կարգախոսներ։
«Դատարկ մեղադրական եզրակացություններ են օգտագործվում կերպարների սպանության համար։ Սա արդարությունը, օրենքը և ժողովրդավարությունը խարխլելու փորձ է։ Ի՞նչ խնդիր ունեք Ստամբուլի և նրա ժողովրդի հետ: Սա՞ եք հասկանում միասնություն, խաղաղություն և ներդաշնակություն ասելով: Ինչ եք կարծում՝ այս մտածելակերպով կկարգավորե՞ք տնտեսությունը, կվերականգնե՞ք երկրի համբավը։ Սա՞ է «Թուրքիայի դարի» ձեր տեսլականը»,- BBC-ի թուրքական ծառայության փոխանցմամբ՝ հայտարարել է Ստամբուլի քաղաքապետ Էքրեմ Իմամօղլուն։
CHP-ի նախագահ Օզգյուր Օզելն էլ կոչ է արել այսօր տեղական ժամանակով 16:00-ին հավաքվել Էսենյուրթի քաղաքապետարանի շենքի մոտ։
Թարգմանությունը՝ Էմմա Չոբանյանի
