Հյուսիսային Կորեան միջմայրցամաքային բալիստիկ հրթիռ է փորձարկել

Հյուսիսային Կորեան միջմայրցամաքային բալիստիկ հրթիռ է փորձարկել, հայտնում է երկրի Կենտրոնական լրատվական գործակալությունը։

Պաշտպանության նախարարության ներկայացուցիչը հայտարարել է, որ հոկտեմբերի 31-ի առավոտյան ԿԺԴՀ-ն միջմայրցամաքային բալիստիկ հրթիռ  փորձնական արձակում է իրականացրել։

«Այսօր ԿԺԴՀ-ի հրթիռաշինության գլխավոր վարչությունը շատ կարևոր փորձարկում է անցկացրել։ Պետության ղեկավարի հրամանով իրականացված այս փորձնական արձակումը թարմացրել է ռազմավարական հրթիռի հզորության ռեկորդը և ցույց տվել ԿԺԴՀ-ի ռազմավարական զսպման ուժերի արդիականությունն ու հուսալիությունն ամենահզոր ուժով»,- ասվում է հրապարակման մեջ։

Հրթիռի փորձարկմանն անդրադարձել է նաև երկրի ղեկավար Կիմ Չեն Ընը։

«Ներկայիս մեկնարկը հարմար ռազմական գործողություն է, որը համահունչ է մեր կամքի արտահայտությանը` պատասխանելու թշնամիներին, որոնք վերջին օրերին միտումնավոր սրում են իրավիճակը տարածաշրջանում և սպառնում ԿԺԴՀ-ի անվտանգությանը, նաև անհրաժեշտ գործընթաց մեր պետության ռազմավարական հարձակողական զինված ուժերի մակարդակը շարունակաբար առավելագույնս բարձրացնելու ճանապարհին»,- ասել է Կիմ Չեն Ընը։

Նա նշել է, որ «ԿԺԴՀ-ն ոչ մի դեպքում չի փոխի միջուկային զինված ուժերի հզորացման  իր կուրսը», և որ «թշնամիների վտանգավոր արկածախնդիր ռազմական գործողություններն ավելի են ընդգծում միջուկային զինված ուժերի ամրապնդման կարևորությունը»։

Հարավային Կորեայի զինվորականներն էլ հայտնել են, որ հրթիռն արձակվել է տեղական ժամանակով 7:10-ին՝ Փհենյանի շրջանից դեպի Ճապոնական ծով: Հրթիռը ծովն է ընկել 87 րոպե անց, Հոկայդո քաղաքից շուրջ 200 կիլոմետր դեպի արևմուտք։

Թարգմանությունը՝ Էմմա Չոբանյանի