Վրաստանի նախագահն իշխող «Վրացական երազանք»-ի վրա ճնշում գործադրելու կոչ է արել Արևմուտքին

Վրաստանի նախագահ Սալոմե Զուրաբիշվիլին արևմտյան երկրներին կոչ է արել լուրջ ճնշում գործադրել իշխող «Վրացական երազանք» կուսակցության վրա՝ վերանայելու հոկտեմբերի 26-ին անցկացված խորհրդարանական ընտրությունների արդյունքները, փոխանցում է Գրուզիա օնլայնը։

«Եթե ճնշում չկիրառվի, դա կնշանակի, որ Արևմուտքն ամեն ինչ չի արել, որպեսզի փորձի Վրաստանը պահել արևմտյան կողմում և եվրոպական հեռանկարում»,- ասել է Զուրաբիշվիլին «Ազատ Եվրոպա/Ազատություն» ռադիոկայանին տված հարցազրույցում։

Վրաստանի Կենտրոնական ընտրական հանձնաժողովի տվյալներով՝ ընտրություների արդյունքում հաղթել է իշխող «Վրացական երազանք» կուսակցությունը՝ հավաքելով ձայների գրեթե 54 տոկոսը։ Վրաստանի օրենսդրության համաձայն՝ այս դեպքում քաղաքական ուժն իրավունք է ստանում ինքնուրույն ձևավորել կառավարություն։ Չորս ընդդիմադիր կուսակցություններ հաղթահարել են հինգ տոկոսի արգելքը։

Զուրաբիշվիլին և ընդդիմությունը հայտարարել են, որ իշխող կուսակցության օգտին մոտ 300 հազար ձայն է կեղծվել։ Վրաստանի նախագահը նաև նշել է ռուսական նարատիվները, որոնք օգտագործել է «Վրացական երազանք»-ն իր նախընտրական քարոզարշավում։

«Ամեն ինչ տեղի է ունենում՝ նայելով Ռուսաստանին. խոստումների փոխարեն՝ նախընտրական սպառնալիքներ, քարոզչություն, որոնք բնորոշ են ռուսական նախընտրական PR ռազմավարություններին։ Ընդհանուր առմամբ, բացարձակապես պարզ է, որ Ռուսաստանն օգնեց Վրաստանի ներկայիս իշխանություններին, նրանց բարոյական աջակցություն ցուցաբերեց և խոստումներ տվեց, թե ինչ կլինի ընտրություններից հետո»,- հայտարարել է նա։

Զուրաբիշվիլին նաև հայտնել է, որ տեղական կազմակերպություններն աշխատում են տվյալների հավաքագրման ուղղությամբ՝ ապացուցելու ընտրական խախտումները։

Թարգմանությունը՝ Տաթև Ֆռանգյանի