Վրաստանի նախագահին հարցաքննության են կանչել ընտրակեղծքիների վերաբերյալ հայտարարությունների համար

Ընտրակեղծիքների մասին հայտարարությունների պատճառով Վրաստանի նախագահ Սալոմե Զուրբիշվիլին կանչվել է Դատախազություն՝ հարցաքննության։ Վրաստանի դատախազության հայտարարության մեջ, մասնավորապես, նշվում է, որ գերատեսչությունը հետաքննություն է սկսել խորհրդարանական ընտրություններում հնարավոր կեղծիքների վերաբերյալ Կենտրոնական ընտրական հանձնաժողովի 2024 թվականի հոկտեմբերի 30-ի բողոքի հիման վրա՝ Վրաստանի Քրեական օրենսգրքի 164-րդ հոդվածի 3-րդ մասով («ընտրակեղծիք»):

«Ըստ ԿԸՀ-ի հայտարարության և ԶԼՄ-ների միջոցով հանրային տարածքում տարածված տեղեկատվության՝ Վրաստանի նախագահ Սալոմե Զուրաբիշվիլին պետք է ապացույցներ ունենա 2024 թվականի խորհրդարանական ընտրությունների հնարավոր կեղծման մասին, և որի կապակցությամբ սահմանված կարգով Վրաստանի նախագահը հետաքննչական վարչություն հարցաքննության է հրավիրվել այս տարվա հոկտեմբերի 31-ին»,- ասվում է հաղորդագրությունում։

Վրաստանի դատախազությունը խոստանում է իրականացնել «բոլոր անհրաժեշտ քննչական և դատավարական գործողությունները, ինչպես նշված է ԿԸՀ-ի դիմումում, նաև ուսումնասիրելու է Վրաստանի նախագահի, առանձին քաղաքական կուսակցությունների ներկայացուցիչների և դիտորդական առաքելությունների կողմից հնչեցված փաստերը»։

«Հետաքննության ընթացքում հարցաքննվելու են բոլոր անձինք, որոնք կարող են տեղեկատվություն ունենալ ենթադրյալ հանցագործության մասին։ Հանրությանը տեղեկացնում ենք նաև, որ նախընտրական շրջանում և ընտրությունների օրը հայտնաբերված առանձին իրավախախտումների ուսումնասիրման նպատակով իրավապահ մարմիններն ակտիվորեն քննում են մի շարք քրեական գործեր։ Նախաքննության արդյունքների մասին դատախազությունը պարբերաբար կտեղեկացնի հանրությանը»,- ասվում է հաղորդագրության մեջ։

Հավելենք, որ Սալոմե Զուրաբիշվիլին հրաժարվել է ճանաչել խորհրդարանական ընտրությունների արդյունքները՝ նշելով, որ երկրում տեղի է ունեցել «ռուսական հատուկ գործողություն»։

Միջազգային հանրությունն իր հերթին հնարավոր ընտրախախտումների միջազգային հետաքննության կոչ է արել։

Թարգմանությունը՝ Էմմա Չոբանյանի