Ինձ համար ամենահարազատ պաշտոնն ազատ քաղաքացին է․ Արտակ Զեյնալյան. ՏԵՍԱՆՅՈՒԹ

«Լույս» դաշինքի քաղաքապետի թեկնածու Երևանը խելքով ու սրտով կառավարելու խոստում տված «Լույս» դաշինքի քաղաքապետի թեկնածու Արտակ Զեյնալյանը Factor.am-ին ասաց, որ չափազանց կարևոր է իր համար այն, որ քաղաքացին վստահի ընտրությունների արդյունքերին․ «Քաղաքացին պիտի հավատա, որ ինքը Երևանի ամենակարևոր մասնիկն է և առանց այդ մասնիկների, որոնք շատ կարևոր են, չկա Երևան»։

«Իմ մասնագիտությունը պրոֆեսիոնալ քաղաքականությամբ զբաղվելն է և դրա դրսևորումներից մեկն էլ Երևանի քաղաքապետի թեկնածու առաջադրվելն էր»,- ասաց Զեյնալյանը։

Իսկ հարցին էլ՝ Արդարադատության նախարարի՞, թե՞ քաղաքապետի պաշտոնն է ավելի նախընտրելի պատասխանեց․ «Ինձ համար ամենահարազատ պաշտոնն ազատ քաղաքացին է»։

Զեյնալյանին հիշեցրինք, որ «Լույս» դաշինքը, նախքան թեկնածուի անունը հայտարարելը, ասում էր, որ այնպիսի թեկնածու կառաջադրեն, որն անխոցելի կլինի։ Արդյոք ինքն իրեն անխոցելի՞ է համարում՝ հարցին պատասխանեց․ «Դա իմ ընկերների համոզմունքն է, ես հարգում եմ այն և չեմ ուզում ընդդիմանալ»։

Քաղաքապետի թեկնածուն ընտրվելու դեպքում առաջնային է համարում աղբահանության, տրանսպորտի և տնտեսական վիճակի բարելավմանն ուղղված ծրագրերը։

«Երևանն ունի իրեն բնորոշ, աննկարագրելի էներգետիկա, որը շենքերով, շինություններով, ճարտարապետությամբ չէ, այլ երևանցիով է պայմանավորված»,- նկարագրելով Երևանն ու երևանցուն` ասաց Արտակ Զեյնալյանը: Իրավապաշտպան, իրավաբան, նախարար Զեյնալյանը դժվարացավ նշել, թե ինչի համար է ափսոսում։ Ասաց` իհարկե կլինեն նման դեպքեր էլ կլինեն, բայց որևէ դրվագ չառանձնացրեց։

Մանրամասները՝ տեսանյութում։

Լիլիթ Շաբոյան