«Վրացական երազանքը» դեմ է ընտրությունների միջազգային հետաքննությանը

Վրաստանի խորհրդարանի նախագահ Շալվա Պապուաշվիլին հայտարարել է, որ ընտրախախտումների հետ կապված բողոքները կքննարկվեն Վրաստանի Կենտրոնական ընտրական հանձնաժողովի կողմից, իսկ «Edison Research»-ի կողմից exit poll-ի կեղծումը, ըստ նրա, պահանջում է միջազգային հետաքննություն, փոխանցում է Գրուզիա օնլայնը։

«Այս երկրում գործում է Վրաստանի իրավասությունը, ոչ թե որևէ այլ երկրի։ Վրաստանի վարչակազմն ու դատարանները համապատասխանում են ամենաբարձր չափանիշներին»,- ասել է նա:

Պապուաշվիլին հավելել է, որ նախկինում վրացական դատարանների որոշումները կասկածի տակ էին դրվել, օրինակ, «Ռուսթավի 2»-ի, ինչպես նաև Նիկա Գվարամիայի, Նիկա Մելիայի և Միխեիլ Սաակաշվիլիի գործերով, սակայն, ի վերջո, Մարդու իրավունքների եվրոպական դատարանը հաստատել է դրանց օբյեկտիվությունը։

«Մենք շատ լավ ներքին հետաքննություն ենք անցկացնում ամեն ինչի հետ կապված, եթե անհրաժեշտություն կա, ապա դա առաջին հերթին նշանակում է բողոքների քննարկում Կենտրոնական ընտրական հանձնաժողովի կողմից»,- ասել է Պապուաշվիլին՝ ի պատասխան ԱՄՆ Պետքարտուղարության և տեղական հասարակական կազմակերպությունների հայտարարությունների, թե անհրաժեշտ է ընտրախախտումների միջազգային հետաքննություն անցկացնել:

Ավելի վաղ ԱՄՆ Պետքարտուղարության խոսնակ Մեթյու Միլլերը հայտարարել էր, որ Վաշինգտոնը միանում է միջազգային և տեղական դիտորդներին՝ կոչ անելով հետաքննել հոկտեմբերի 26-ին Վրաստանում տեղի ունեցած ընտրություններում հայտնաբերված խախտումները։ Նա չի հստակեցրել՝ արդյո՞ք հետաքննող մարմինը պետք է լինի վրացական, թե՝ ոչ, սակայն նշել է, որ ԱՄՆ-ը խորհրդակցում է եվրոպացի գործընկերների հետ այն հարցի շուրջ, թե որ մարմինը նպատակահարմար կլինի նման հետաքննություն անցկացնելու համար։

Թարգմանությունը՝ Տաթև Ֆռանգյանի