04.04.2026 | 20:03
ՃՏՊ՝ հրդեհի բռնկմամբ
Թուրքիայի ԱԳ նախարարը մեկնում է Լոնդոն՝ քննարկելու պաշտպանական և առևտրի ոլորտում համագործակցությունը
Քաղաքականություն
29.10.2024 | 16:30
Թուրքիայի ԱԳ նախարար Հաքան Ֆիդանը հոկտեմբերի 30-ին առաջին պաշտոնական այցով կմեկնի Մեծ Բրիտանիա։ Իր բրիտանացի գործընկերոջ՝ արտգործնախարար Դեյվիդ Լամիի հետ, ի թիվս այլ հարցերի, թուրք պաշտոնյան կքննարկի նաև երկկողմ առևտրային համաձայնագրերի և պաշտպանական համագործակցության ընդլայնման հարցերը։ Այս մասին հայտնում է TRT Haber-ը՝ վկայակոչելով դիվանագիտական աղբյուրներին։
Նշվում է, որ Ֆիդանը փոխանցելու է Թուրքիայի պատրաստակամությունը՝ վերաբանակցելու և ընդլայնելու Բրիտանիայի հետ Ազատ առևտրի համաձայնագիրը, որը ստորագրվել է 2020 թվականի դեկտեմբերին՝ ԵՄ-ից Միացյալ Թագավորության դուրս գալուց հետո։ Այս քայլը դիտարկվում է որպես իր հիմնական առևտրային գործընկերներից մեկի հետ տնտեսական կապերը խորացնելու՝ Թուրքիայի ջանքերի մի մաս: Երկու երկրների միջև առևտրի ընթացիկ ծավալը 2023 թվականին հասել է 19,5 միլիարդ դոլարի, և երկու կառավարություններն էլ մտադրություն են հայտնել այն հասցնել 30 միլիարդ դոլարի։
Բացի այդ, Ֆիդանն ու Լամին քննարկելու են այն քայլերը, որոնք կարող են ձեռնարկել երկու դաշնակից երկրները պաշտպանական արդյունաբերության ոլորտում։
Ակնկալվում է, որ բանակցությունների առանցքային հարցերը կլինեն նաև ահաբեկչության դեմ պայքարի և անվտանգության հարցերը։
Ֆիդանի այցը նաև կընդգծի Թուրքիայի դիրքորոշումը իսրայելա-պաղեստինյան հակամարտության սրման վերաբերյալ։ Թուրք պաշտոնյան կանդրադառնա Անկարայի մտահոգություններին Գազա մարդասիրական օգնություն հասցնելու դժվարությունների հետ կապված, Իսրայելի վերջին հարվածներին հետո Լիբանանում և Իրանում տիրող իրավիճակին:
Թարգմանությունը՝ Էմմա Չոբանյանի
